“Më parë e vras Albin Kurtin sesa që ia lëshoj rrugën e iku nga Kosova”, është deklarata që dha mbrëmë kreu i OVL-UÇK, Faton Klinaku.
Në fakt ushtruesi i detyrës së Kryetarit të Organizatës së Veteranëve të Luftës së UÇK-së, Faton Klinaku fillimisht tregoi një bisedë që tha se e ka pasur me votuesin e Kurtit, i cili sipas tij ka thënë se “s’ka mbetur tjetër gjë pos me ikë jashtë”.
E Klinaku në këtyë rrëfim të tij thotë se iu ka përgjigjur duke thënë se “më parë e vras Albin Kurtin sesa që ia lëshoj rrugën e iku nga Kosova”.
Kjo deklaratë ka nxitur reagime. Lëvizja për Demokraci thotë se Faton Klinaku duhet te arrestohet menjëherë pas deklaratës skandaloze ku e përmend vrasjen e Albin Kurtit!
“Është një shembull i papranueshëm i përdorimit të retorikës së ekstremizmit në politikë. Në një kohë kur Kosova ka nevojë për bashkëpunim, dialog dhe për të ndërtuar një të ardhme të qetë dhe të sigurt, kjo lloj retorike nuk kontribuon në asnjë mënyrë pozitive, por nxit urrejtje dhe vrasje në mes vete”, thuhet në reagimin e Lëvizjes për Demokraci.
Reagimi i plotë i Lëvizjes për Demokraci:
Deklarata e kryetarit të OVL UÇK-së, në të cilën ai deklaron “Më parë e vras Albin Kurtin sesa që e lëshoj Kosovën,” është një shembull i papranueshëm i përdorimit të retorikës së ekstremizmit në politikë. Në një kohë kur Kosova ka nevojë për bashkëpunim, dialog dhe për të ndërtuar një të ardhme të qetë dhe të sigurte, kjo lloj retorike nuk kontribuon në asnjë mënyrë pozitive, por nxit urrejtje dhe vrasje në mes vete.
Sundimi i ligjit dhe respektimi i drejtave të njeriut janë vlerat kryesore të një shoqërie demokratike. Kërcënimet dhe thirrjet për dhunë janë të papranueshme dhe dëmtojnë thelbin e një shoqërie të përgjegjshme. Përdorimi i gjuhës së ekstremizmit dhe kërcënimeve ndaj kryeministrit të Republikës së Kosovës nuk përfaqëson standardet dhe vlerat që duhet të ndiqen për të ndërtuar një shoqëri të përbashkët dhe të harmonizuar.
Kjo lloj retorike nxitë tensione dhe përplasje të panevojshme në shoqëri. Është shqetësuese që nje përfaqësuese i OVL- UCK-së të përdor fjalë dhe deklarata të tilla. Në një demokraci funksionale, dialogu dhe komunikimi i qetë janë mjetet kryesore për zgjidhjen e mosmarrëveshjeve dhe për të përballuar sfidat e ndryshme.
Është e rëndësishme të kujtojmë se politika duhet të jetë e përgjegjshme dhe të kontribuojë në të mirën e përgjithshme të shoqërisë. Thirrjet për vrasje dhe dhunë nuk përfaqësojnë asgjë tjetër përveç kërcënimit ndaj ligjit dhe rendit. Këto deklarata krijojnë imazhe të rënda për Kosovën në arenën ndërkombëtare dhe pengojnë përpjekjet për të ndërtuar një imazh pozitiv të vendit.
Në përfundim, është e domosdoshme të ndërtojmë një politikë të përgjegjshme dhe të qetë, duke refuzuar gjuhën e ekstremizmit dhe kërcënimeve. Në vend që të përdorim fjalë që inkurajojnë ndarjen dhe konfliktin, duhet të punojmë për të gjetur pikat e përbashkëta dhe zgjidhje konstruktive për të ardhmen e vendit tonë. Andaj një deklaratë e tillë duhet te dënohet dhe personi përgjegjës të arrestohet menjëherë.
