Këshilltarja e kryeministrit Albin Kurti, Ardita Sinani ka publikuar disa tabela me të punësuarit në institucionet e prokurorisë, gjyqësorit e policisë, e ku shihet se Serbia vazhdon të diskriminoj shqiptarët në Luginë të Preshevës, duke mos lejuar përfaqësim sipas marrëveshjeve të arritura ndër vite.
Sinani ka theksuar në një reagim të saj se Serbia nuk ka zbatuar qëllimet thelbësore të marrëveshjeve, siç janë integrimi, rimëkëmbja e shpejtë ekonomike, kthimi i popullatës së zhvendosur dhe çmilitarizimi i rajonit nga ana e njësive speciale të sigurisë.
“Krahas obligimeve kushtetuese dhe ligjore, si dhe obligimeve të cilat imponohen nga marrëveshjet tanimë të njohura ndërkombëtare; Serbia ka marrë ndaj Preshevës, Bujanocit dhe Medvegjës edhe obligime të posaçme me tri dokumente të veçanta, të cilat janë miratuar nga ana e qeverisë.
21 vjet më vonë, në të gjitha institucionet që nuk janë nën kompetenca të Komunave (që janë në kompetenca të Qeverisë Republikane ose Administratës së Rajonit), numri i shqiptarëve është simbolik, e ka madje institucione ku nuk ka fare shqiptarë”, ka thënë ajo.
Ish-kryetarja e Komunës së Preshevës, Sinani shtoi se jo vetëm që nuk janë punësuar shqiptarët lokalë, por janë sjellë edhe serbë të rajoneve të tjera nga Serbia.
“Kjo është Serbia për pakicat e saj kombëtare”, ka shkruar ajo.
Presheva, Medvegja dhe Bujanoci janë tri komuna me shumicë shqiptare, por kërkundër kësaj përfaqësimi në institucioni nuk është sipas popullsisë.
