Deputetja e Lidhjes Demokratike të Kosovës (LDK), Hykmete Bajrami ka reaguar pasi platforma online E-Kosova në të cilën është hapur linku ku prindërit mund të aplikojnë për subvencionim të teksteve shkollore ka rënë nga sistemi.
Përmes një postimi në Facebook, deputetja e LDK-së ka listuar disa “anomali” që sipas saj, vijnë pas vendimit të MAShT-it për tekstet shkollore.
“Disa prindër i kanë llogaritë bankare të bllokuara, çmimi i librave ende nuk dihet, prindërit ende nuk e dinë se me çfarë librave dë të punojnë mësimdhënësit, prindërit nesër kur të shkojnë në librari nuk do t’i gjejnë të gjitha librat, sepse shtepitë botuese ende nuk e kanë idenë e kërkesës, disa komuna s’kanë librari fare dhe prindërit do të detyrohen të lënë punën e të udhëtojnë për t’i blerë librat dhe atë sigurt jo vetëm njëherë”, ka thënë Bajrami.
Sipas saj, kjo do t’i kushtojë me miliona euro më shumë e fëmijëve do të ju kushtojë me mijëra orë të humbura.
“Dështim total, kaos e çka jo tjetër. Dorëheqja nuk mjafton”, ka vijuar ajo.
Vlen të theksojmë se të premten është publikuar linku në platformën E-Kosova, link ky në të cilin prindërit mund të aplikojnë për subvencionim të teksteve shkollore për fëmijët nga klasa parë deri në të pestën, si dhe për fëmijët nga klasa e gjashtë deri në të nëntën për materiale shtesë shkollore.
Ky publikim i linkut vjen pasi të enjten, Ministria e Arsimit ka njoftuar se do të ndajë 80 euro për nxënësit nga klasa 1 deri në klasën e 5 për blerjen e teksteve dhe të materialeve mësimore dhe 30 euro për nxënësit nga klasa 6 deri në klasën e 9, të cilët tashmë i kanë të siguruara tekstet mësimore si mbështetje për materiale të tjera shkollore.
Linku për aplikim për subvencionim të teksteve shkollore, https://ekosova.rks-gov.net/Service/5
Ministrja e Arsimit, Arbërie Nagavci, nëpërmjet një videoje në rrjetin social, Facebook, ka thënë se kjo është një masë për të ndihmuar familjet me koston e lëndëve mësimore për fëmijët e tyre.
Sipas saj, mjetet për subvencionim do të transferohen në xhirollogaritë e prindërve nga fillimi i javës së ardhshme.
“Nga nesër mund të aplikoni për subvencionimin e teksteve shkollore. Mjetet do të dalin në xhirollogaritë tuaja që nga fillimi i javës së ardhshme. Do të ndahen 80 euro për nxënësit nga klasa 1 deri në klasën e 5 për blerjen e teksteve dhe materialeve mësimore”, ka thënë Nagavci.
