Një shtetas i Kosovës është arrestuar në Sarandë pasi ka mbajtur mbyllur për rreth një orë gjashtë italianë që po qëndronin në apartamentin e tij.
59-vjeçari ka thënë se ata ia kishin dëmtuar disa pajisje në apartamentin që ua lëshoi me qira.
Policia e Shqipërisë është njoftuar dhe ka shkuar në vendin e ngjarjes.
“Si rezultat i veprimeve të menjëhershme të shërbimeve të Policisë, është vënë në pranga shtetasi J. A., 59 vjeç, banues në Prishtinë, si dhe është bërë lirimi i shtetasve, nga apartamenti. 59-vjeçari, për rreth 1 orë, iu ka hequr lirinë 6 shtetasve italianë, në apartamentin që iu kishte dhënë me qira, pasi pretendonte se këta shtetas i kishin dëmtuar disa pajisje në këtë apartament”, njoftoi Policia e Shtetit.
Rasti është iniciuar si “heqje e paligjshme e lirisë” kundër shtetasit të Kosovës.
