Rritja e numrit të të infektuarve me koronavirus në Kosovë ka vënë në gjendje të gatishmërisë spitalet.
Drejtori i Shërbimit Spitalor Klinik dhe Universitar të Kosovës, Valbon Krasniqi, thotë se situata aktualisht është e qetë, por ka tendencë të përkeqësimit.
Të mërkurën e 13 korrikut, Ministria e Shëndetësisë e Kosovës ka raportuar për 763 raste të reja me koronavirus.
Në bazë të 2,030 testeve të bëra, del se 37.5 për qind e të testuarve kanë dalë pozitivë.
Në raportin e përditshëm të Ministrisë së Shëndetësisë njoftohet edhe për një të vdekur nga koronavirusi.
Shkalla e infektimit me koronavirus në Kosovë ka nisur të rritet në gjysmën e dytë të qershorit.
Muajt e pranverës kanë qenë kryesisht të qetë – ka pasur ditë me zero raste.
Besohet se në qarkullim janë disa nënvariante të variantit Omicron të koronavirusit, që përhapen më shpejt, por shkaktojnë më pak simptoma.
Duke folur për Radion Evropa e Lirë, Krasniqi thotë se numri i pacientëve me koronavirus, të shtrirë në spitalet e Kosovës, aktualisht është rreth 40.
“Ne, si SHSKUK, duhet të jemi të përgatitur, siç kemi qenë gjithmonë, për t’u përballur eventualisht me ndonjë fluks më të madh të pacientëve. Tash për tash, situatën e kemi të qetë”, thotë Krasniqi.
Pandemia e koronavirusit ka shpërthyer në mars të vitit 2020 dhe në periudha të caktuara të saj, Kosova është përballur me valë të rënda, që kanë imponuar angazhime shtesë të stafit mjekësor, por edhe shtim të shtretërve në klinika të ndryshme.
Aktualisht, në Klinikën Infektive të Qendrës Klinike Universitare të Kosovës, e cila ka bartur barrën më të rëndë gjatë pandemisë, janë të shtrirë 11 pacientë me koronavirus.
Më 12 korrik, nga kjo klinikë janë raportuar dy viktima nga koronavirusi.
“Rastet që kanë ndërruar jetë, kanë qenë të shtrira në mjekim intensiv dhe kanë qenë në moshë të shtyrë”, thotë drejtori i Klinikës Infektive, Arben Vishaj.
Sipas tij, dy rastet në fjalë kanë pasur edhe sëmundje të tjera shoqëruese.
