Ushtruesi i detyrës së kryeshefit ekzekutiv të “Trepçës”, Enis Abdurrahmani, ka deklaruar se janë marrë masa ndaj 151 minatorëve që kanë sabotuar punën javë më parë, nëpërmjet sanksionimit të mëditjeve dhe shujtave ditore.
Ai tha se nëse bojkoti i punës thellohet, sipas rregulloreve të brendshme të kësaj ndërmarrjeje, sanksionet ndaj minatorëve do të jenë me pagë deri në 40 për qind.
“Një vlerë që mund të jetë e përafërt (e humbjeve ditore në rast të mos punës) varet nga shumë faktorë, mund të jetë nga 40 mijë deri në 50 mijë euro në ditë,… Në konsultim me zyrën ligjore dhe departamentet tjera, kemi marrë masat e para që çdo bojkot dhe sabotim në punë do të sanksionohet me ndalesa të ekzekutimit të mëditjeve dhe shujtave ditore, dhe nëse ky bojkot dhe sabotim thellohet, atëherë i kemi masat e rregulloreve të brendshme të cilat sanksionojnë edhe me pagë deri në 40 për qind, mirëpo ligjet i kemi shumë të qarta që do të thotë se çdo bojkot dhe sabotim mbi tre ditë pune mund të shpie edhe deri në shkëputje të marrëdhënies së punës për çdo punëtor që e bënë këtë vepër…Masa fillestare është marrë ndaj 151 punëtorëve të cilët kanë bojkotuar punën, dhe një kalkulim i përafërt i masës financiare që do të merret ndaj tyre do të jetë rreth 176 euro për një punëtor, për këto katër ditë të bojkotit të punës”, ka deklaruar Abdurrahmani për KSP-në.
Sipas U.D të kryeshefit ekzekutiv, “Trepça” ka trashëguar borxhe që kapin vlerën e mbi 20 milionë eurove nga menaxhmentet e kaluara, derisa shtoi se falë angazhimit të Qeverisë, ato janë zvogëluar në masë të madhe.
“Borxhet e trashëguara janë mbi 20 milionë. Ne kemi arritur në kategori të caktuara t’i reduktojmë dhe zvogëlojmë këto borxhe, këto detyrime të ndërmarrjes. Kemi arritur të zvogëlojmë detyrimet nga kategoria e borxheve që i kemi ndaj ATK-së, mbi 4.2 milionë, i kemi zvogëluar borxhet ndaj operatorëve ekonomikë kontraktuesve mbi 2.5 milionë, kemi arritur t’i reduktojmë borxhet dhe obligimet ndaj KESKO-s dhe KEK-ut”, u shpreh ai.
Abdurrahmani theksoi se ndërmarrja ka nënshkruar marrëveshje për investime kapitale mbi 15 milionë euro. Ai foli edhe për praktikantë, që tha se “Trepça” së fundmi ka pranuar 210 të tillë, në afat kohor prej gjashtë muajsh.
