Zëvendësministri i Drejtësisë, Blerim Sallahu në një postim në Facebook, ka reaguar ndaj pretendimeve të Prokurorisë lidhur me rastin e rezervave shtetërore, ndërsa ka kujtuar rastin e ngjashëm kur po kjo prokurori pronën e shtetit dhënë një privati pa asnjë bazë ligjore, e kishte cilësuar si çështje procedurale dhe civile.
Sallahu tha se rasti i fundit është tregues, kur çështja me karakter komplet civil tentohet të kthehet në çështje penale si formë hakmarrje ndaj qeverisë.
Ai tha se kur lidhet një kontratë me element të huaj, në mes shtetit dhe një operatori ekonomik ndërkombëtar, në të cilën përcaktohet saktë sasia e mallit që do të vie, çmimi dhe pagesa dhe pavarësisht mosardhjes së mallit ose ardhjes së kufizuar të saj në Kosove, nuk mund të ketë karakter tjetër përveçse civil.
“Ky kontest civil zgjidhet në gjykatën kompetente të përcaktuar në kontratë. Pra, zgjidhja e kontestit civil determinon se a mund të ketë vepër penale në këtë rast ose jo. Siç shihet nga provat dhe faktet operatori ekonomik nuk ka sjell mallin në tërësi dhe kësisoj gjykata mund të merr vendim duke detyruar operatorin e tillë ekonomik për dëmshpërblim. Prandaj në këtë rast në asnjë formë nuk ka përgjegjësi penale”, ka thënë Sallahu.
Pra, sipas tij, realizimi i kontratës bonafide nga MINT dhe mosrealizimi i kontratës nga operatori ekonomik në tërësi nuk përbën vepër penale por bazë të mjaftueshme për realizim të dëmshpërblimit në gjykatë.
“Nëse vendimi i tillë merret në gjykatën kompetente në Kosovë, atëherë ky vendim njihet dhe ekzekutohet ne vendin ku ndodhet selia e operatorit-ve ekonomik.
Nëse do të shkonim me supozimin se secili mosrealizim i kontratës ose realizim i pjesshëm i kontratës do të plotësonte figurën e veprës penale atëherë krejt qytetaret e këtij shteti do jenë përgjegjës penalisht dhe do ta shuanim të drejtën civile si degë e së drejtës”, ka shkruar Sallahu.
Për fund, zëvendësministri kujtuar rastin e ngjashëm kur po kjo prokurori e kishte cilësuar si çështje procedurale dhe civile, kontratën që pronën e Shërbimit Korrektues ia kishin dhënë një personi, madje pas asnjë bazë ligjore.
“Vet Prokuroria Speciale ka mbyllur rastin e Vicianumit (pronë e Shërbimit Korrektues ku i është dhënë në shfrytëzim për afat 10 vjeçar një personi fizik, pastaj është regjistruar si person juridik) ku është lidhur kontratë bash pa asnjë bazë ligjore, ku janë rrënuar objektet shtetërore, duke theksuar në aktvendim për hudhjen e kallëzimit penal se ka shkelje procedurale dhe civile, por jo penale.
Edhe njëherë, e njëjta “prokurori speciale” e ka bërë këtë veprim. Prandaj, është keqpërdorim i mekanizmave ligjor për hakmarrje, e asgjë më shumë!”, ka theksuar mes tjerash Sallahu.
