Buja e madhe që krijuan disa portale dhe mandej bastisjet në Ministria e Industrisë, Ndërmarrësisë dhe Tregtisë (MINT) dhe arrestimet e tre personave me urdhër të Prokurorisë, kanë nxitur reagime të shumta.
Prokuroria Speciale e Kosovës tha se të arrestuarit dyshohen për veprat penale: “keqpërdorim i detyrës zyrtare” dhe “dhënie e ndihmës në kryerjen e veprës penale të keqpërdorimit të detyrës zyrtare”.
Por, ndaj këtyre veprimeve ka reaguar zëvendësministri i Mjedisit, Planifikimit Hapësinor dhe Infrastrukturës, Avni Zogiani, i cili ka ngritur çështjen e blerjes me çmim të ulët të tokës së shtetit dhe mandej shitjen me çmim shumë të lartë, po shtetit, raporton KosovaNews
Ai në këtë rast ka përmendur një rast, duke aluduar në zyrtarin e lartë të PDK-së, Sami Lushtakun, i cili tokën e kishte blerë me 50 euro dhe mandej ia kishte shitur shtetit me 7 mijë euro.
“E ke blerë (token publike) 50 euro, e ia ke shitë shtetit 7 mijë euro! “Ani çka…?” Inagjinojeni, për këtë nuk ka filluar hetimet prokuroria!!!! Kur dihet se fjala është për dikë që ka përdorur pushtetin për ta dëmtuar shtetin për interesa të veta!”, ka shkruar në reagimin e tij zëvendësministri Zogiani.
Ish-kryetari i Skenderajt dhe tani nënkryetar në këtë komunë e zyrtarë i lartë i Partisë Demokratike të Kosovës (PDK), Sami Lushtaku, kohë më parë, më 2021 kishte rrëfyer pasurinë e tij në emisionin “Kallxo Pernime”.
Lushtaku atë kohë ka treguar për pasurinë që e kanë pasur para luftës dhe pasurinë që e kanë krijuar pas luftës.
“Unë para luftës i kam pasë 3 shpia. I kemi pasë dy lokale tona. Një lokal në Skenderaj dhe një market në fshat. I kena pasë edhe dy kerre”, tha Lushtaku.
“Mas luftës, unë kam një shtëpi në Skenderaj. E kemi privatizu me një shok temin një lokal në Skenderaj që ka kushtu diku 65 mijë euro. E kam privatizu shumë herët. Nuk e di sa metra lokali ka qenë. Unë kam hy në kredi me marrë. Kur jam kanë unë në burg, jemi detyruar me shit lokalin. Nuk e di sa e kemi shitë”, tha Lushtaku.
Ai ka treguar edhe për privatizimin e 50 hektarëve tokë në fshatin Komoran të Drenasit.
“E kam një tokë 50 hektar që e kam përgjysmë me një mik, në Komoran. Tani e kam shit shtëpinë në Skenderaj. Vitin kur e kam ble tokën nuk e di. E kam ble me privatizim. E kemi privatizu diku 200 e diçka mijë euro, sa ka kushtu ari nuk e di. Jemi hy në kredi për me ble. Ma kanë dhanë kredinë 200 mijë euro”, rrëfen Lushtaku për pasurinë e tij.
Ajo tokë që Lushtaku e kishte privatizuar nga Agjencia Kosovare e Privatizimit ishte shpronësuar disa vite më vonë për ndërtimin e autostradës. Madje me çmim shumë herë më të shtrenjtë.
“Toka është afër autostradës. Një pjese e tokës është shpronësuar. Diku rreth 50 euro arin e kemi ble. Kur është shpronësuar, nuk e di saktë, po diku 5, 6 ose 7 mijë euro ka qenë çmimi”, tha Lushtaku.
