Kryetari i Kuvendit te Kosovës, Glauk Konjufca dhe kryeministri i Republikës, Albin Kurti, kanë bërë homazhe te varri i veprimtarit dhe intelektualit, Adem Demaçi.
Kurti dhe Konjufca, kanë vendosur kurora lulesh te varri në 5 vjetorin e vdekjes së veprimtarit Demaçi, ndërsa kanë vlerësuar kontributin e tij dhënë për vendin.
Kryeministri Kurti në një deklaratë para mediave ka thënë se Demaçi është figurë e jashtëzakonshme dhe unike e kombit shqiptar.
Ai shtoi se “jeta dhe vepra e bacës Adem, idetë dhe udhëzimet e tij na mbushin me përgjegjësi dhe vetëbesim njëkohësisht”.
“Vendosëm lule të freskëta dhe bëmë nderime te varri i Adem Demaçit këtu në Prishtinë. Sot u mbushen 5 vjet kur baca Adem shkoi në amshim dhe sigurisht që kemi pikëllim e mallëngjim që nuk e kemi më por edhe kemi krenari e mirënjohje që e patëm dhe e njohëm, që punuam e mësuam prej tij”, u shpreh Kurti.
Ndërsa, kryetari i Kuvendit të Kosovës, Glauk Konjufca tha se baca Adem është një nga figurat më të rëndësishme të kombit shqiptar.
Konjufca tutje u shpreh se Demaçi ka qenë në krye të proceseve më të rëndësishme të kombit. “Një nga figurat më të rëndësishme të kombit shqiptar…Për shkak të respektit që e kishim e thërrisnim baci Adem. Pas luftës së dytë botërore ka qenë një nga figurat më të rëndësishme, pasi ka ditur t’i artikulojë të drejtat më të rëndësishme të kombit shqiptar. Ai ka qenë në krye të proceseve më të rëndësishme të kombit tonë. Duke filluar prej viteve 50 kur u burgos për herë të parë e deri më 1998…Ka lënë gjurmë të pashlyeshme tek ne”, ka thënë Konjufca.
Me prejardhje nga fshati Lupq i Podujevës, Demaçi u lind më 26 shkurt 1936 në Prishtinë, ndërsa më 26 korrik ndërroi jetë. Adem Demaçi ishte veprimtar për kauzën kombëtare në kohën e Jugosllavisë dhe luftonte për barazinë e Kosovës me republikat e tjera.
I njohur si simbol i rezistencës kombëtare, i ndjeri Adem Demaçi sot do të mbushte 87 vjet.
Për angazhimin e tij politik, Adem Demaçi vuajti 28 vite me radhë në burgjet e Jugosllavisë. Pasi u lirua ai menjëherë vazhdoi aktivitetin e tij politik. Ai u quajt edhe Nelson Mandela i Evropës.
Adem Demaçi udhëhoqi Këshillin për të Drejtat dhe Liritë e Njeriut (KMDLNJ) nga viti 1990 deri në vitin 1995. Në vitin 1991 u nderua nga Parlamenti Evropian me Çmimin Saharov. Gjatë periudhës 1998-1999, kur mbaheshin takimet në Rambouillet për të ardhmen e Kosovës, ai ishte zëdhënës politik i UÇK-së. Ishte njëkohësisht kryetar i Lidhjes së Shkrimtarëve të Kosovës (2005-2007).
Sot, njerëzit e rezistencës kombëtare identifikohen me emrin e Adem Demaçit, sepse ai me punën dhe me veprën e tij, u bë simbol i unifikimit për ruajtjen e kombit shqiptar, mbi pesë dekada.
Adem Demaçi me jetën dhe veprën e tij, u shndërrua në një personalitet të përmasave të historisë së përgjithshme njerëzore, ku bën pjesë edhe historia jonë kombëtare. Ai ka shkruar romanin “Gjarprijt e Gjakut” i cili u ndalua nga regjimi ish-komunist. Ai e pa dritën vetëm pas viteve nëntëdhjetë.
Pasditen e 26 korrikut të vitit 2018, Demaçi ndërroi jetë. Në nderim të tij u organizuan shumë aktivitete shtetërore si dhe u mbajtën tri ditë zie në Kosovë.
