Kryetari i AAK-së, Ramush Haradinaj, ka kritikuar partitë opozitare se nuk po tregohen serioze nëse po duan ta rrëzojnë Qeverinë apo jo.
Ai ka thënë se është shtuar numri i atyre që besojnë se Qeveria dhe kryeministri Albin Kurti “janë fatkeqësi për Kosovën”.
“Një shumicë kritike pajtohet se është e nevojshme që sa më parë të dilet nga kjo gjendje. Njëra parti kërkon zgjedhje për të ndalur këtë të keqe që po i bëhet vendit, ndërsa partia tjetër është në kërkim të një rruge të re, po ashtu për të dalur nga kjo gjendje”, ka shkruar Haradinaj.
Kreu i Aleancës ka shtuar se partia e tij ka ofruar mocionin e mosbesimit si model për të dalë nga situata.
“Në fakt edhe njëra edhe tjetra parti opozitare, po e kërkojnë të njëjtën gjë që e kemi kërkuar edhe ne, por nuk po e shohin mënyrën se si realizohet kjo! Pyetja ime është, si shkohet në zgjedhje, ose si gjendet rruga e tretë për të dalë nga kjo gjendje? A ta presim kryeministrin që ta dorëzojë me vullnet mandatin e tij, gjë e cila duket e pamundshme, apo të presim të ndodhë ndonjë mrekulli vetvetiu?” ka pyetur Haradinaj.
Haradinaj ka theksuar duke iu drejtuar partive opozitare se mocioni është rruga e vetme që duhet të ndiqet.
“Prandaj partitë tjera opozitare, nëse janë të sinqerta në qëndrimin e tyre se kjo qeveri duhet ndalur me çdo kusht sepse po e shkatërron vendin, atëherë duhet ta kuptojnë se mocioni i propozuar prej nesh, është rruga e vetme, rrjedhimisht edhe ta mbështesin”.
