Të paktën një person ka vdekur për shkak të një stuhie me erëra deri në 145 km/h që goditi Holandën sot.
Ndërkohë autoritetet u kanë bërë thirrje banorëve të qëndrojnë brenda.
Një grua 51-vjeçare humbi jetën në Haarlem kur një pemë ra mbi makinën e saj, tha policia lokale.
Në Amsterdam, shumë njerëz u plagosën për shkak të rënies së pemëve, të cilat dëmtuan edhe makina dhe varka përgjatë kanaleve të qytetit.
Shërbimi Kombëtar i Motit ka lëshuar një paralajmërim ‘të kuq’ për stuhi në pjesën më të madhe të vendit, niveli më i lartë i alarmit.
Stuhia, e quajtur Polly, është më e keqja që ka goditur Holandën në muajt e verës dhe më e forta që nga janari 2018.
Stuhitë e forta zakonisht godasin Holandën midis tetorit dhe prillit. Stuhia e fundit e verës u regjistrua në vitin 2015.
