Në mungesë të përfaqësuesit të palës së paditur, Klan Kosova sh.p.k, është shtyrë seanca përgatitore e paraparë të mbahet të enjten në Departamentin për Çështje Ekonomike të Gjykatës Komerciale, në rastin ku “3V” sh.p.k (kompani që merret me prodhimin e filmave, videove dhe programeve të tjera), ka ushtruar padi ndaj Klan Kosovës për zhdëmtim të posaçëm për shkelje të të drejtave të autorit.
Në seancën e sotme, e pranishme ishte përfaqësuesja e autorizuar e paditësit “3V” sh.p.k, avokatja Rina Kika, si dhe pronari i kompanisë, Gazmend Bajri, raporton Betimi për Drejtësi.
Ndërkaq, gjykata konstatoi se të paditurës Klan Kosova, ftesa për seancën e sotme i është dërguar përmes Postës dhe nga fletëkthesa e dorëzuar në gjykatë rezulton se të njëjtën e ka pranuar më 15 qershor 2023, mirëpo në këtë seancë nuk prezanton askush.
Andaj, në këto rrethana gjykatësja e rastit Verona Dibra konstatoi se nuk janë plotësuar kushtet për mbajtjen e seancës së sotme, meqenëse nuk ka kaluar afati ligjor për pranimin e ftesës nga ana e të paditurës.
Me këtë, seanca e sotme u shty dhe ajo e radhës u caktua të mbahet më 6 korrik 2023.
Sipas padisë së ushtruar më 28 shkurt 2020, paditësi “3V” sh.p.k, ka ushtruar padi për zhdëmtim të posaçëm për shkelje të të drejtave të autorit ndaj Klan Kosovës.
Kjo pasi që siç thuhet në padi, palët e lartcekura ishin marrë vesh që filmi- dokumentari “Ferdonija” i prodhuar nga “3V” sh.p.k të transmetohet në kanalin televiziv Klan Kosova në emisionin “Info Magazine” për një herë të vetme, dhe për atë transmetim paditësi do duhej të paguhej 1 mijë e 500 euro.
Në padi thuhet se dokumentari “Ferdonija” është transmetuar në emisionin “Info Magazine” dhe pa lejen e paditësit, filmi është transmetuar online në faqen e Klan Kosovës për 7 ditë me radhë, duke shkelur kështu të drejtën autoriale të paditësit, duke mos realizuar as pagesën për të cilën ishin dakorduar palët.
Përmes kësaj padie, paditësi “3V” sh.p.k ka kërkuar nga gjykata që të detyrojë të paditurën Klan Kosova që t’ia paguajë paditësit shumën prej 31 mijë e 500 euro për shkeljen e të drejtave të autorit nën kërcënimin e përmbarimit të detyrueshem të borxhit si dhe kamatëvonesën ligjore të aplikueshme për transaksionet tregtare.
Po ashtu, përmes padisë kërkon që të urdhërohet shpallja në masmedia e aktgjykimit me shpenzimet e të paditurës-Klan Kosova dhe që të detyrohet kjo e fundit që t’i marrë përsipër shpenzimet procedurale të procesit gjyqësor dhe të avokates.
