Deputeti i Kuvendit të Kosovës ka shkruar sot për çështjen e bizneseve të grupit të Devollëve, që disa nga kompanitë e tyre siç janë Klan Kosova dhe Art Motion, i kanë regjistruar jashtë vendit e si investime nga Serbia.
Duke komentuar gjithë zhvillimet e fundit që ndodhën pas raportimit të KosovaNeës, deputeti Dimal Basha ka thënë se liria e mashtrimit nuk mbulohet me lirinë e shprehjes siç është rasti me këto dy kompani.
Ai madje ka shtruar pyetjen pse deri më tani askush nga gazetarët e vendit nuk ka mundur që të intervistoj pronarët e Klan Kosovës dhe Art Motion, që të tregojnë versionin e tyre, pasi kjo është me interes për publikun.
“Gjithë këto media e gazetarë të pavarur në vend, ende asnjë nuk arriti me siguru një intervistë ekskluzive me pronarët ose “pronarin” e Klan Kosova Sh.P.K. dhe ART MOTION, ku na kallxojnë pse në Maqedoni janë regjistruar si investim nga Serbia, e këtu Republika e Kosovës, e adresat i kanë Djakove dhe Pejë, mirëpo shteti është Serbi? Nëse janë investime nga Serbia gjithë këto miliona investime, besoj publike ka shumë interes! Nëse nuk qenkan Devollët, kush qenkan këta ‘shefat’ që s’po i njeh kush?!
S’paku Adriatiku si drejtor ish dashtë me pas njëfar “Ekskluziviteti” me këta ‘shefat’ e tij edhe m’i intervistu, sepse ky si gazetar por edhe drejtor e ka më së vështiri besoj!”, ka shkruar deputeti Basha.
Ai tha se të akuzohet Qeveria se po synon me ia mbyll gojën mediave është farsë, sepse kanë kaluar kohërat kur pushtetarët thërrasin e kërcënojnë media.
“Nuk ka pas kurrë liri ma të madhe të mediave, dhe këtë e besojmë thellë sepse jemi qeveri demokratike, mirëpo lirinë e mashtrimit nuk mundeni me na e shit për liri të shprehjes! Aman na kurseni nga BS!”, ka shkruar në reagimin e tij Basha.
