Serbët në veri të Republikës së Kosovës do të vazhdojnë protestën e tyre për të pestën ditë më radhë. Protestat po mbahen në Zveçan, Zubin Potok dhe Leposaviq.
Serbët kanë paralajmëruar se protesta në këto komuna fillon nga ora 7:00 e mëngjesit.
Në Zveçan kanë nisur të grumbullohen që nga orët e para të mëngjesit, por në numër më të vogël se dje.
Punonjësit e Autoritetit të Përkohshëm të Komunës së Zveçanit, që funksionon nën sistemin e Serbisë, janë duke u regjistruar në listën e të punësuarve që është vendosur në një tavolinë, si dëshmi “që vijnë në punë”.
Situatë e qetë raportohet të jetë këtë mëngjes në Zubin Potok, ku tash për tash është mbledhur një numër i vogël protestuesish serbë.
Objektin e komunës është duke e ruajtur Policia e Kosovës, ndërsa forca të KFOR-it tash për tash nuk shihen.
