Ministri i Bujqësisë, Faton Peci i shoqëruar edhe nga zëvendësministri i Punëve të Brendshme, Blerim Gashani sot gjatë ditës ka vizituar edhe kryetarin e ri të Komunës së Mitrovicës Veriore, Erden Atiq.
Peci ka njoftuar se i ka ofruar mbështetje të plotë Erden Atiqit, ndërsa tha se e gëzon fakti se kryetari i ri menjëherë ka nisur punën duke konsoliduar një ekip shumëetnike.
“Sot në mëngjesin e hershëm kisha kënaqësinë që bashkë me Zëvendësministrin e Brendshëm, Blerim Gashani, të vizitoj Kryetarin e Komunës së Mitrovicës Veriore, Erden Atiq. I ofrova mbështetje të plotë për sfidat që e presin. Na gëzon fakti që për një periudhë të shkurtër, ai ka konsoliduar ekipin në përbërje shumëetnike, që është refleksion i vullnetit politik dhe gjenerozitet i shoqërisë kosovare për të krijuar mundësi për të gjitha komunitetet”, ka theksuar ai.
Ministri Peci dhe zv. Ministri Gashani sot më herët kanë vizituar edhe kryetarin e Leposaviqit.
Ministri i Bujqësisë, Faton Peci pasi i ka shkuar në zyrë kryetarit të ri të Leposaviqit, Lulzim Hetemit, tregoi për planet e projektet shumëmilionëshe për qytetarët e komunës.
“Së bashku me Zëvendësministrin e Brendshëm, Blerim Gashani, kisha kënaqësinë e veçantë të vizitojmë sot në zyrën e tij, z. Lulzim Hetemin, Kryetarin e Komunës së Leposaviqit. Ia uruam detyrën e re dhe i ofruam tërë mbështetjen e Qeverisë së Republikës së Kosovës. Si Ministër i Bujqësisë, i tregova kryetarit Hetemi për planet e projektet shumëmilionshe për bujqësinë për qytetarët e komunës që ai udhëheq, pa asnjë dallim përkatësie etnike e tjetërfare. There’s is a new sherif in town”, ka shkruar ministri Peci.
