Violeta Pirana nga Shoqata e Pacientëve me Kancer të Gjirit “Renesansa”, ka deklaruar se bari Valamar për pacientët me kancer duhet të përfshihet në Listën Esenciale.
Mes interpretimesh të ndryshme të dhëna nga Klinika e Onkologjisë dhe Ministrisë së Shëndetësisë për atë nëse duhet të jetë i përfshirë në Listën Esenciale ose jo ky bar, Pirana ka thënë se onkologët duhet të insistojnë më tepër pasi numri i pacientëve që e marrin këtë ilaç është shumë i madh.
“Ky ilaç duhet të merret tërë jetën jo vetëm një kohë të caktuar. Sipas të drejtave të njeriut çdo njeri ka drejtë të marrë ilaçin qe ja zgjat jetën. Nuk ka të drejtë askush të dënojë me vdekje pacientin duke mos ja aprovuar ilaçin për jetë. Onkologët e KO duhet të insistojnë më tepër për Ribociclib. Ilaçi kushton shumë shtrenjtë dhe buxheti i familjeve kosovare nuk mund të mbulojë këtë ilaç. Pacienti nuk mundet ta ndërprejë asnjë ditë ilaçin, sepse jeta e saj varet nga ky ilaç”, ka shkruar ajo në Facebook.
Pirana ka ftuar të gjithë pacientët që marrin ribociklib që të lajmërohen, në mënyrë që të dihet numri i saktë i tyre. Ajo gjithashtu ka bërë thirrje për vendimmarrësit që të bëjnë zgjidhje për këtë çështje.
“Lista Esenciale është nënshkruar por ribociclibi nuk është në këtë listë e që do të duhej medoemos të ishte. Mendoni për jetën e njeriut. Ftoj të gjithë që janë në pozita vendimmarrëse që të vendosin me arsye të shëndoshë dhe të ecin me këpucët e pacientit me kancerin e gjirit metastazik. Zgjidhje ka, por duhet vullnet. Përndryshe pacienti do të dorëzohet dhe kjo nuk do të jetë në rregull”, ka shtuar Pirana.
Të hënën KOHA ka raportuar për lënien jashtë Listës Esenciale të këtij bari që mjekët thonë se e përdorin 40 paciente me kancer të gjirit.
Në Klinikën e Onkologjisë kanë thënë se ky bar ose një tjetër i ngjashëm duhej të ishte pjesë e listës. E në Ministrinë e Shëndetësisë kanë deklaruar se, sipas ekspertëve të OBSH-së, ky bar nuk konsiderohet kosto-efektiv për shtete si Kosova.
Në listat bazë të shteteve të rajonit ky bar është i përfshirë.
