Ekipi mbrojtës i Nagip Krasniqit, drejtor i Korporatës Energjetike të Kosovës (KEK), i cili është pezulluar nga kjo detyrë pas arrestimit nën dyshimin për korrupsion, ka dorëzuar në Gjykatën Supreme kërkesën për lirimin e tij nga masa e paraburgimit.
E pas lajmit për kërkesën që Krasniqi të lirohet, avokati Tomë Gashi ka shtruar disa pyetje, ndërsa e ka quajtur ta padrejtë veprimin e prokurorisë dhe gjykatës për rastin e drejtorit të KEK-ut.
“3 pyetje për rastin e z. Nagip Krasniqi: (1) Kujt i ka penguar ai? (2) Kujt i ka leverdisur arrestimi i tij? (3) Kujt po i pengon lirimi i tij? Nuk ka e as nuk ka pasur asnjë arsye për paraburgimin e z. Krasniqi, por ka shumë arsye që ai të lirohet sa më shpejtë”, ka shkruar në rrjetin social avokati Gashi.
Ai tutje sqaron se Gjykata e Apelit i ka anuluar dy prej tri arsyeve për të cilat Krasniqi i është caktuar masa e paraburgimit.
“E vetmja arsye që ka mbetur është kinse mundësia e ndikimit në dëshmitarë, të cilët janë përmendur me emra dhe mbiemra. Si është e mundur që të ndikojë në dëshmitarë kur të njëjtit kanë dhënë deklarata në Polici, kurse Prokuroria, për këto 20 ditë nga arrestimi i z. Krasniqi, ka pasur mundësi që t’i marrë në pyetje përsëri për (mos) ta zvarritur procedurën?”, ka thënë ai.
Për këtë arsye avokati Gashi thotë se ekipi mbrojtjes së Krasniqit ka dorëzuar ankesë (kërkesë për mbrojtje të ligjshmërisë) në Gjykatën Supreme dhe tani kjo gjykatë duhet të vendosë drejt, pra ta lirojë sa më shpejtë që është e mundur Krasniqin dhe ta përmirësojë një padrejtësi të (pa)qëllimshme që e kanë bërë Prokuroria dhe Gjykata e nivelit të parë.
Në këtë rast Tomë Gashi thotë se prokuroria e gjykata e dinë se me veprimet e Krasniqit janë shpëtuar miliona euro dhe nuk është krijuar asnjë dëm, sepse asnjë cent nuk i është paguar asnjë kompanie/firme në tenderët një burimor.
“Nëse nuk më besoni mua, si avokat i z. Krasniqi, besoni Gjykatës së Apelit – sepse ajo thotë kështu në vendimin e saj”.
Sipas tij, nuk duhet me qenë jurist i fortë për ta kuptuar që nuk ka vepër penale nëse nuk ka asnjë dëm.
Por avokati Gashi konsideron se dëmi më i madh që dikush dëshiron ta krijojë qëllimisht, është që përmes rastit të Krasniqit ta godas Lëvizjen Vetëvendosje dhe ta godasin imazhin super të mire të kryeministrit Albin Kurti.
“… e nga pak ta ngacmojnë klientin tim z. Martin Berishaj – për të cilin nuk ka asnjë dyshim që të ketë bërë ndonjë veprim të kundërligjshëm”.
