Policia e Kosovës njofton se një grua në Prishtinë është therur me thikë, pasi ka ndërhyrë dhe ka tentuar të ndalë një rrahje mes bashkëshortit të saj dhe dy burrave.
Në raportin 24 orësh të Policisë, thuhet se rasti ka ndodhur të hënën në rrugën “Mustafë Kruja”, në Prishtinë.
“Ankuesja kosovare ka raportuar në polici se derisa ka ndërhyre për t’i ndarë gjatë një rrahje burrin e saj dhe dy të dyshuar meshkuj kosovar njëri nga të dyshuarit e ka goditur me thikë në dorë duke i shkaktuar lëndime trupore”, thuhet në njoftim.
Sipas Policisë, viktima është dërguar për trajtim mjekësor, ndërsa njëri nga të dyshuarit është arrestuar.
“Njëri nga të dyshuarit është arrestuar dhe me vendim të prokurorit është dërguar në mbajtje, ndërsa i dyshuari tjetër gjendet në arrati”, thuhet në njoftim.
