Kryetari i Federatës së Basketbollit të Kosovës, Arben Fetahu, është deklarua për dyshimet se ka pas kurdisje në disa ndeshje të basketbollit ku ka thënë ka kërkuar që rasti të zbardhet nga autoritetet e vendit.
Sipas Fetahut kjo kërkesë e tij drejtuar organeve të rendit është për ta ruajtur integritetit garave që janë nën organizimin e Federatës së Basketbollit të Kosovës.
“Kam kërkuar që rasti të zbardhet nga autoritetet e vendit, me qëllim të parandalimit të fenomeneve të tilla në të ardhmen, duke shprehur përkushtimin tonë për garantim integritetit të palëkundur të garave të saj dhe njoftim të të gjitha rasteve të njohura e potenciale të keqpërdorimeve, manipulimeve apo kurdisjeve potenciale tek organet kompetente, pa asnjë përjashtim dhe kufizim, duke qenë se veprimet e papërgjegjshme të individëve të caktuar mund ta dëmtojnë në mënyrë të pariparueshme imazhin dhe renomenë e sportit të basketbollit në vendin tonë”, ka deklaruar Kryetari i Federatës së Basketbollit të Kosovës, Arben Fetahu.
Më poshtë mund ta lexoni reagimin plotë të Kryetarit të Federatës së Basketbollit të Kosovës, Arben Fetahut.
Gjatë pasdites së ditës së enjte kemi marrë informatë që dy nga tre referët e deleguar për ndeshjen në fjalë kanë pasur një takim të paautorizuar me persona të tretë, pa njoftim dhe informim të FBK.
Me të konfirmuar informatën për këtë kontakt të paautorizuar, përkundër faktit që nuk kemi pasur kurrfarë dëshmie për ndonjë keqpërdorim potencial, FBK-ja i ka ndërruar nominimin, me qëllimin që të shmangim çfarëdo mundësie të ndikimit apo manipulimit të rezultatit të ndeshjes dhe ruajtjes së integritetit të garës sonë elitare, i cili ka qenë dhe vazhdon të jetë i pandikuar nga faktorë negativë të jashtëm.
Në emër të Federatës së Basketbollit të Kosovës kam njoftuar zyrtarisht Këshillin Kombëtar për Parandalimin e Dhunës dhe Dukurive tjera Negative në Sport për këtë ngjarje dhe kam kërkuar që rasti të zbardhet nga autoritetet e vendit, me qëllim të parandalimit të fenomeneve të tilla në të ardhmen, duke shprehur përkushtimin tonë për garantim integritetit të palëkundur të garave të saj dhe njoftim të të gjitha rasteve të njohura e potenciale të keqpërdorimeve, manipulimeve apo kurdisjeve potenciale tek organet kompetente, pa asnjë përjashtim dhe kufizim, duke qenë se veprimet e papërgjegjshme të individëve të caktuar mund ta dëmtojnë në mënyrë të pariparueshme imazhin dhe renomenë e sportit të basketbollit në vendin tonë.
Njëkohësisht, në emër të FBK-së i kam njoftuar edhe kryetarët e katër ekipeve pjesëmarrëse të kësaj faze të garës për ngjarjen dhe për arsyet e ndërrimit të nominimit për ndeshjet në vijim, ndërsa nga organet e FBK kam kërkuar vigjilencë të shtuar në ndeshjet në vijim për të garantuar kushte të barabarta të garimit në terrenet e basketbollit.
