Autoritetet e Serbisë kanë ashpërsuar veprimet ndaj serbëve të cilët nuk po i bindën Listës Serbe për t’i bojkotuar zgjedhjet lokale të së dielës. Këtë javë në pikëkalimin kufitar në Jarinjë, policia e Serbisë arrestoi Dragan Nikoliqin dhe Dushan Tomoviqin, me akuzën se janë pjesë e një grupi kriminal. Por avokati i Nikoliqit, me të cilin ka biseduar KOHA, thotë se akuza i është veshur, pasi bashkëshortja e klientit të tij kandidon për Kuvendin Komunal në Leposaviq. Pavarësisht presionit, ai thotë se Ivana Nikoliq nuk do të tërhiqet nga gara
Beogradi zyrtar ka intensifikuar përndjekjen e serbëve të Kosovës të cilët nuk iu binden urdhrave të Listës Serbe. Këtë javë ish-pjesëtari i Policisë së Kosovës, Dragan Nikoliq, dhe Dushan Tomoviq nga Zubin-Potoku, u arrestuan nga policia e Serbisë dhe po mbahen në paraburgim. Avokati i Nikoliqit, Ivan Niniq, ka thënë se klienti i tij akuzohet se bashkë me katër serbë të tjerë janë duke punuar për ta shkatërruar rendin kushtetues dhe sigurinë e Serbisë.
Ai ka thënë se rasti po tentohet të montohet me dëshmitarë nga veriu që janë mbështetës të Listës Serbe dhe anëtarë të partisë së Aleksandër Vuçiqit.
“Draganit i është caktuar masa e paraburgimit prej 30 ditësh. Ai ndodhet në Beograd, në Burgun Qendror dhe me rastin është duke u marrë Prokuroria e Lartë në Beograd. Presim që në ditët në vijim të dëgjohen dëshmitarët e Prokurorisë. Ata duhet të vijnë nga veriu i Kosovës në Beograd për t’i dhënë deklaratat. Prokurori ka propozuar 9 dëshmitarë dhe ata janë mbështetës të Listës Serbe dhe anëtarë të Partisë Përparimtare Serbe, dhe disa dëshmitarë që janë të punësuar si zyrtarë në Komunën e Leposaviqit. Nuk kemi parë asnjë provë nga Prokuroria dhe policia serbe. Akuzat janë shumë të rënda dhe Dragani rrezikon të dënohet me 10 vjet burgim për shkak të krimit për të cilin akuzohet”, ka deklaruar Niniq.
Ai ka shtuar se arrestimi i Dragan Nikoliqit është hakmarrje nga Beogradi, pasi bashkëshortja e tij, Ivana, garon për këshilltare në Leposaviq si pjesë e Partisë së Serbëve të Kosovës.
“Pavarësisht se ndodhet në burg, Dragani dhe bashkëshortja e tij, Ivana, kanë vendosur që të mos e tërheqin kandidaturën para Partisë së Serbëve të Kosovës në Leposaviq dhe ajo kështu të marrë pjesë në zgjedhje. Dje bisedova me Draganin në Burgun e Beogradit dhe ai më tha t’ia përcillja mbështetjen Ivanës për të mbetur kandidate dhe për të luftuar deri në fund. Dragani është një burrë trim dhe nuk dëshiron që Milan Radojçiq të jetë shefi i tij”, ka deklaruar avokati.
Politikanë opozitarë nga veriu thonë se është për keqardhje nëse ka përndjekje të atyre që kanë vendosur të garojnë në zgjedhjet.
Ndaljen e kërcënimeve ndaj komunitetit serb e ka kërkuar edhe emisari i Shteteve të Bashkuara të Amerikës për Ballkanin Perëndimor, Gabriel Esccobar. Sipas tij, djegia e automjeteve dhe kërcënimet ndaj njerëzve që duan të integrohen nuk vijnë nga shqiptarët, por nga serbët.
Në zgjedhjet e së dielës do të garojnë 11 kandidatë, dy prej të cilëve janë nga komuniteti serb.
Lista Serbe, si subjekti më i madh i serbëve në Kosovë, nuk ka kandiduar për pjesëmarrje në këto zgjedhje.
