Kryeministri i Shqipërisë Edi Rama deklaroi, këtë të premte, se qeveria shqiptare po shqyrton mundësinë për të dalë nga juridiksioni i Gjykatës së Arbitrazhit. Duke marrë shkas nga pyetjet mbi faturën totale që shteti shqiptar duhet të paguajë për shkak të gjyqeve të humbura, kryeministri u shpreh i revolutar jo vetëm për mënyrën se si funksionon arbitrazhi, por dhe qasjen e opozitës.
“Në vend që të revoltohen që një kriminel i gjykuar dhe i dënuar me 17 vjet burg për mashtrim të shtetit shqiptar arrin të çajë rrugën në një gjykatë me të cilën ne do të hapim probleme të mëdha, duke filluar nga java e ardhshme dhe nga e cila madje, po analizojmë dhe mundësinë të daljes fare nga ai juridiksion sepse është skandaloze ajo që ka ndodhur”, tha Rama.
Këto qëndrime të kreut të qeverisë shkaktuan një reagim të menjëhershëm te opozita. Sali Berisha e konsideroi këtë si hap të madh mbrapa, pasi sipas tij Arbritrazhi ndërkombëtar është i detyrueshëm për vendet anëtare të OKB-së.
“Arbitrazhi Ndërkombëtar është nën ombrellën e Bankës Botërore, rrjedhimisht të OKB-së. Kjo pasi institucionet e Bretton Woods, BB, FMN dhe IFC, janë institucione të OKB-së. Arbitrazhi i kësaj organizate është i detyrueshëm për të gjithë anëtarët, për të gjithë vendet anëtare të BB-së dhe OKB-së. Ajo që ndodh është se në disa nga këto arbitrazhe, bashkëshortja ka qenë Avokate e Shtetit, bashkëshorti ka qenë avokat i të paditurit. Kjo ndodh vetëm në Shqipëri dhe në asnjë vend tjetër. Mos u habisni nëse këto gjoba janë ndarje parash mes paditësve dhe të paditurve”, u shpreh Berisha.
Shteti shqiptar deri më tani është përballur me disa padi në arbitrazh si marrëveshja me CEZ apo padia e sipërmarrësit italian Becchetit.
