Ministrja e Drejtësisë, Albulena Haxhiu, sërish ka komentuar vendimin e Gjykatës Kushtetuese për rrëzimin e Ligjit për Këshillin Prokurorial të Kosovës. E ka cilësuar aktgjykimin si paradoksal, kundërthënës e befasues.
“Aktgjykimi i Gjykatës për Projektligjin për KPK-në ishte befasues, ishte paradoksal, ishte kundërthënës”, ka thënë Haxhiu, në foltoren e Kuvendit të Kosovës.
Ajo ka thënë se nuk do të lejojnë korporatizimin brenda Këshillit Prokurorial dhe ka paralajmëruar procedimin e ndryshimeve.
“Pavarësisht vonesave që po na i shkaktoni, ne nuk do të ndalemi”, ka thënë Haxhiu.
Pas publikimit të aktgjykimit, ministrja e Drejtësisë, Albulena Haxhiu kishte thënë se Gjykata Kushtetuese e ka mbrojtur interesin personal të disa anëtarëve të Këshillit Prokurorial të Kosovës e jo interesin e përgjithshëm.
Më 24 mars, Gjykata Kushtetuese kishte shpallur të pavlefshëm Ligjin për Këshillin Prokurorial të Kosovës (KPK), pas kërkesës për vlerësim të kushtetutshmërisë së këtij ligji nga deputetët e Partisë Demokratike të Kosovës dhe Lidhjes Demokratike të Kosovës, vitin e shkuar.
Ndërkohë, Këshilli Prokurorial i Kosovës kishte mirëpritur vendimin e Gjykatës Kushtetuese, e cila rrëzoi Ligjin për KPK-në të sponsorizuar nga Qeveria dhe miratuar nga Parlamenti.
