Presidenti i Malit të Zi, Milo Gjukanoviq, ka shpërndarë parlamentin sot, pas skadimit të afatit prej 90 ditësh që mandatari Miodrag Lekiq kishte për të formuar qeverinë e re.
Sipas ligjit malazez, Gjukanoviq është i detyruar të thërrasë zgjedhjet parlamentare një ditë pas shpërndarjes së parlamentit, të cilat duhet të mbahen jo më vonë se 80 ditë nga data e shpalljes së zgjedhjeve, shkruan Index.
Gjukanoviq më parë kishte refuzuar t’ia besonte mandatin Lekiqit, duke pretenduar se ai nuk e kishte bindur atë se kishte mbështetjen e deputetëve për të formuar një qeveri të re.
Pas kësaj, partitë në pushtet në Mal të Zi, të udhëhequra nga Fronti Demokratik pro-Serb, miratuan amendamentet në ligjin për presidentin, i cili bëri të mundur që presidenti i parlamentit ta bënte këtë në rast të refuzimit të presidentit për t’i besuar mandat Lekiqit.
Komisioni i Venecias dha një mendim negativ për atë ligj, duke gjykuar se ai bie ndesh me kushtetutën malazeze dhe u dënua nga zyrtarët e Bashkimit Evropian dhe të SHBA-së, të cilët kërkuan që qeveria në Mal të Zi të mos formohet në bazë të një ligj antikushtetues.
Kërkesa e tyre u miratua nga përfaqësuesit e URA-s, partia e kryeministrit teknik Abazoviq, i cili nuk pranoi të mbështesë kabinetin e Lekiqit para se ai të vinte në parlament.
Ndërkohë, të dielën në Mal të Zi mbahen zgjedhjet presidenciale, në të cilat marrin pjesë shtatë kandidatë.
