Ministria e Kulturës, Rinisë dhe Sportit të martën e 14 marsit ka ndarë Çmimin Kombëtar Letrar për Vepër Jetësore “Azem Shkreli” dhe katër çmime të tjera në fushën e letërsisë, atë për veprën më të mirë në prozë, në poezi, në kritikë letrare si dhe për veprën më të mirë të përkthyer në gjuhën shqipe.
Juria, e kryesuar nga Osman Gashi dhe me anëtarët Bardh Rugova, Rrahman Paçarizi, Gëzim Aliu dhe Azem Deliu, pasi i ka lexuar librat dhe veprat konkurrente për çmimet vjetore dhe nominimet e pranuara për Çmimin për Vepër Jetësore, ka vendosur që:
Me këtë rast, çmimi kryesor, ai për Veprën Jetësore “Azem Shkreli”, iu nda shkrimtarit Zejnullah Rrahmani.
Ndërsa, çmimi për veprën më të mirë në prozë “Anton Pashku” iu dha Veli Karahodës për romanin “Fundi i palavdishëm i Igor Bagrickit”.
Sabit B. Bajraktari për librin “NOAH” fitoi çmimin për veprën më të mirë për poezi “Ali Podrimja”, e çmimin për veprën më të mirë në kritikë letrare dhe eseistike “Ibrahim Rugova” e mori Haqif Mulliqi për veprën “Henrik Ibsen – fryma e parë e modernes”.
Çmimi i pestë, ai për veprën më të mirë të përkthyer në gjuhën shqipe “Pjetër Bogdani” iu dha Meliza Krasniqit për përkthimin e veprës “Arti i fiksionit” të David Lodge.
Kryetari i jurisë, Osman Gashi, i cili prezantoi raportin e jurisë dhe vendimin për çmimet letrare, tha se juria ka vendosur që mos të ndajë çmimin e paraparë për veprën më të mirë për fëmijë dhe të rinj “Vehbi Kikaj”.
“Çmimin e paraparë për veprën më të mirë për fëmijë dhe të rinj “Vehbi Kikaj” juria propozon të mos e ndajë fare.”, tha Gashi.
