Kosova dhe Serbia duhet ta shfrytëzojnë momentin dhe ta pranojnë Planin e Bashkimit Evropian për normalizim raportesh, që është kyç për stabilitetin e tërë rajonit, ka thënë presidentja e Komisionit Evropian, Ursula von der Leyen.
“Mendoj se është një mundësi që të dyja palët duhet të shfrytëzojnë momentin sepse normalizimi është i një rëndësie kyçe për sigurinë, stabilitetin dhe prosperitetin e rajonit”, ka thënë Von der Leyen në një bisedë me gazetarë të “European Newsroom”.
“Kam shumë shpresë që të dyja palët do të jenë kontruktive në diskutimet e ardhshme”.
Kujtojmë se për procesin e dialogut Kosovë-Serbi, Von der Leyen ka folur ditë më parë edhe me presidentin amerikan, Joe Biden.
Kosova dhe Serbia janë pajtuar për përmbajtjen e Planit evropian për normalizim raportesh. Diskutimet janë duke u bërë në kuadër të planit implementues.
Emisari i Bashkimit Evropian për dialogun Kosovë-Serbi, Miroslav Lajçak, ditëve të fundit ka qëndruar në Kosovë dhe Serbi për të diskutuar për implementimin e këtij plani.
Krerët e dy shteteve takohen më 18 mars në Ohër.
