Zjarri ka kapluar mëngjesin e sotëm objektin e mbrojtur të trashëgimisë kulturore, ish- Gjimnazin e parë shqiptar “Ismail Qemali”, në Ferizaj.
Siç raportohet zjarri ka filluar në orët e hershme të mëngjesit deri sa zjarrfikësit kanë intervenuar menjëherë për të ndaluar flakët e dëmet.
Lajmin e ka konfirmuar Kanun Veseli, zëdhënës në policinë e Ferizajt.
“Sot rreth orës 04:25 është raportu një incident zjarri në një shkollë që nuk është funksionale, rruga “Ramadan Rexhepi”, policia e zjarrfikësit kanë dalë në vendin e ngjarjes. Zjarri është lokalizuar”, tha Veseli.
Ndërtesa e Gjimnazit është objekt i trashëgimisë kulturore dhe deri tani është e disata herë që i vihet zjarri.
Ndaj këtij fenomeni ka reaguar edhe deputeti i Kuvendit të Kosovës, Enver Haliti, i cili ka kërkuar nga organet e rendit që ta hetojnë dhe të zbulohet urdhërdhënësi i këtij krimi.
“Krimi i organizuar dëshiron që ta shlyejë historinë e Ferizajt. Sot për herë të katërt ose të pestë i vihet flaka objektit të mbrojtur të trashëgimisë kulturore, ish Gjimnazit të parë shqiptar Ismail Qemali në Ferizaj. Ftoj organet e rendit që ta hetojnë dhe të zbulohet urdhër dhënësi i këtij krimi. Turp!”, ka shkruar në reagimin e tij deputeti Haliti.
