Sot është bërë vënia e gurthemelit të Shkollës Fillore të Mesme të Ulët “Fan S. Noli” në Kamenicë.
Në këtë ngjarje ka marrë pjesë kryeministri Albin Kurti, ministrja e Arsimit, Arbërie Nagavci dhe kryetari i Komunës së Kamenicës, Kadri Rahimaj.
I pari i ekzekutivit ka thënë se projektit që po i vihet gurthemeli sot ka të bëjë me ndërtimin e një shkolle moderne.
“Është kënaqësi të takohemi në këtë ditë kaq të bukur kur po vendosen themelet e një shkolle të re. Kësaj shkolle që mban emrin e një prej intelektualëve më të shquar. Përkujtimi i tij është simbolikë me domethënie të madhe. Projekti i kësaj shkolle është ai i një shkolle moderne. Do të ketë sipërfaqe prej 4500 metrave katrorë. Pas disa viteve shkollimi në kushte të papërshtatshme, nxënësit e Kamenicës do ta kenë një shkollë që i plotëson kushtet për rritjen dhe zhvillimin e tyre”.
Ministrja Nagavci ka bërë të ditur që si Qeveri e Kosovës, mbeten të përkushtuar në mbështetjen për zhvillimin e arsimit.
“Jemi të përkushtuar që të mbetemi në mbështetjen tuaj. Qe të ofrojmë një mësimdhënie bashkëkohore për fëmijët tanë”.
Ndërsa kryetari i Komunës së Kamenicës, Kadri Rahimaj, ka theksuar se projekti në fjalë do të kushtojë 1.7 milionë euro.
“Projekti i kësaj shkolle ka 20 klasë, 5 kabinete, menzë, kuzhinë, palestra sportive dhe të gjitha elementet tjera të nevojshme. Ngrohja do të jetë një kombinim mes energjisë solare dhe biomasë”.
Lexoni edhe këtë:
