Zyra e Kryeministrit është deklaruar rreth takimit të zhvilluar të dielën midis kryeministrit Albin Kurti dhe ministrit të Jashtëm grek, Nikos Dendias, në një restorant në periferi të Prishtinës.
Në njoftimin e ZKM-së thuhet se në këtë takim është diskutuar procesin e normalizimit të marrëdhënieve midis Kosovës dhe Serbisë, si dhe për propozimin evropian për Marrëveshjen Bazë.
“Me këtë rast kryeministri Kurti e njoftoi ministrin Dendias për takimin e 27 shkurtit në Bruksel dhe pritjet e Kosovës nga takimi i 18 marsit në Ohër të Maqedonisë së Veriut”, thuhet në njoftim.
Më tej është bërë e ditur se në këtë drekë është diskutuar edhe për marrëdhëniet ndërmjet dy vendeve dhe perspektivat për avancimin, themelimin dhe fuqizimin e tyre.
“Kryeministri Kurti i shprehu edhe një herë ngushëllime ministrit Dendias dhe popullit grek për jetët e humbura në aksidentit tragjik që ndodhi në Greqi në javën e parë të marsit”, thuhet në komunikatë.
