Tragjedia që ndodhi në Greqi këtë të mërkurë ka lënë pas 43 viktima.
Kjo është shifra që raportohet deri më tani nga përplasja e trenave në afërsi të Larisës.
Kryeministri grek Kyriakos Mitsotakis i është drejtuar vendit me anë të një konference për mediat pas përplasjes së dy trenave në Larisa.
Ndër të tjera, kreu i qeverisë helene konfirmoi se bëhet fjalë për një gabim njerëzor.
“Çdo gjë tregon se tragjedia, për fat të keq, erdhi kryesisht si pasojë e një gabimi njerëzor.”
Mitsotakis u premtoi qytetarëve se çështjes do t’i shkohet deri në fund teksa shtoi se ndërkohë është urdhëruar nisja e një hetimi të pavarur për ngjarjen.
Aksidenti hekurudhor ka ndodhur në hyrje të luginës së Tempes, ku treni i pasagjerëve që udhëtonte midis Athinës dhe Selanikut me 350 persona në bord u përplas me një tren mallrash.
Sipas mediave greke bëhet fjalë për 130 të lënduar dhe 66 persona që po marrin mjekim në spital. 6 prej tyre janë në gjendje të rëndë.
Të mbijetuarit kanë treguar se vagonët u përfshinë me shpejtësi nga flakët, njerëzit digjeshin të gjallë, ndërsa ishte shumë e vështirë të nxirrje personat nga mjeti i shkatërruar.
Greqia ka shpallur 3 ditë zie kombëtare në nder të viktimave.
Publikohet momenti i përplasjes së dy trenave në Greqi
Ndërkohë mediat greke kanë publikuar momentin tragjik kur dy trenat përplasen kokë më kokë në Larisa. Përplasja është kaq e fortë, sa menjëherë shpërthejnë flakët.
Nga ajo që mund të shihet edhe në video trenat udhëtonin në të njëjtën hekurudhë, me shpejtësi prej 166 km/h, duke e bërë të pamundur shmangien e përplasjes.
