Bashkësia Islame e Kosovës, dega në Podujevë ka reaguar pasi e ka mbyllur përkohësisht xhaminë e fshatit Halabak.
Kjo pas një përleshje që ka ndodhur aty në lidhje me pajtimet dhe mospajtimet për hoxhën e ri të emëruar nga BIK-u.
”Këshilli i Bashkësisë Islame në Podujevë është i shqetësuar dhe e dënon incidentin e ndodhur mbrëmë afër xhamisë së fshatit Halabak. Njoftojmë opinionin publik se ne më parë për atë xhami kishim lëshuar autorizim për kryerje të riteve fetare deri në një vendim i cili do të ishte unifikues për të gjithë banorët e atij fshati“, thuhet në njoftim.
Nga BIK thuhet se tani, kur pakënaqësitë janë thelluar, përkohësisht e kanë mbyllur xhaminë, deri në një vendim tjetër.
“Bashkësia Islame tërë angazhimin e saj po e bënë për të ruajtur qetësinë mes banorëve. Duhet ditur se xhamitë janë vend paqeje dhe i qetësisë shpirtërore, ndaj bëjmë thirrje për përmbajtje dhe mirëkuptim deri te një vendim sa më unifikues“, përmbyllet njoftimi.
