Zëdhënësi i Lëvizjes Vetëvendosje, Arlind Manxhuka, i është kundërpërgjigjur akuzave të Lidhjes Demokratike të Kosovës, e cila tha se Qeveria e drejtuar nga LVV-ja i ka mashtruar qytetarët, duke premtuar reciprocitet me Serbinë e duke thyer rekord të importit nga ky vend.
Manxhuka ka thënë se derisa Lidhja Demokratike ishte duke qeverisur, ndër veprimet e para që janë marrë nga kryeministri i atëhershëm, Avdullah Hoti ishte heqja e reciprocitetit.
Sipas tij, gjatë qeverisjes PDK-LDK, me kryeministër Isa Mustafën, është shënuar rekord i importeve nga Serbia.
“Përveçse ndër vendimet e para të kryeministrit nga LDK, Avdullah Hoti, ishte heqja e reciprocitetit me Serbinë, ata mbajnë edhe një rekord tjetër. Në kohën e qeverisjes PDK-LDK, me kryeministër Isa Mustafën është rekordi i importeve nga Serbia. Në vitin 2017 sipas të dhënave zyrtare vlera e importit nga Serbia ishte 449.3 milionë euro”, ka shkruar Manxhuka në Facebook.
Paraprakisht Manxhuka ia ka kujtuar LDK-së se deri sa flet për reciprocitet sot, duhet kujtuar vendimin e saj të parë që bëri sapo rrëzuan Qeverinë Kurti I.
Ai ia kujtoi LDK-së se vendimin e parë të saj në qeverisjen me kryeministër Avdullah Hotin, ishte heqja e reciprocitetit ndaj Serbisë.
LDK ka kritikuar sot Qeverinë e Kosovës për çështjen e reciprocitetit me Serbinë dhe importin e mallrave nga Serbia.
