Komuna e Prishtinës ka njoftuar se nga mëngjesi i sotëm për tri ditë radhazi do të vazhdojë sërish testimi i shndërrimit të gjithë unazës qendrore të kryeqytetit në qarkore njëkahëshe për automjetet.
Por kjo ka shkaktuar sot tollovi në qytet, duke bërë kolona të gjatë të automjeteve në të gjitha rrugët kryesore në kryeqytet.
Ekipi i KosovaNews ka bërë VIDEO nëpër rrugët e kryeqytetit dhe mori disa deklarata nga qytetarët.
Ata e kanë quajtur eksperiment katastrofal testimin që ka bërë kryetari i Prishtinës, Përparim Rama.
“Kjo nuk është në rregull aspak, këto vonesa që po shkaktohen në punë tash le të vjen Përparim Rama dhe le t’i arsyeton. Kjo nuk është në rregull”, ka thënë një qytetare, e cila kishte zbritur dhe ecte në këmbë për të shkuar në punë pas vonesës.
Kurse një tjetër qytetar që ishte në kolonë me veturën e tij e ka quajtur “eksperiment me qytetarë testin e Ramës”.
“Qe një orë jam këtu as që kam lëvizur. Po ta dija nuk do të dilja nga shtëpia as fëmijët s’i kisha dërgu në shkollë”, shprehet i mllefosur një qytetar tjetër.
Kujtojmë se sipas njoftimit të komunës së Prishtinës, qarkorja njëkahëshe gjatë këtyre ditëve do të jetë funksionale në drejtim të rrugëve:
– Rruga “Agim Ramadani”që nga semaforët pranë ish-mensës së Studentëve e deri te rreth-rrotullimi prapa ndërtesës së Komunë
– Rruga “UÇK” nga Parlamenti e deri te ish-Kino Rinia.
– Rruga “Migjeni” deri te ndërtesa e ish-OSBE
– Rruga “Luan Haradinaj” deri te semaforët pranë Bankës Qendrore
– Rruga “Ukshin Hoti”
– Rruga “Robert Doll” .
