Bjeshkët e Belegut të Deçanit sot ishin të stërmbushura nga 400 skijatorë nga vende të ndryshme të Kosovës.
Garën e organizuar të skijimit “Kupa e Gjeravicës” në bashkëpunim me Federatën Skitare të Kosovës, për U30 e fitoi Arbi Popovci, ndërsa U21 për femra Arba Popovci, raporton KosovaPress.
Kryetari i Deçanit, Bashkim Ramosaj, tha se është për keqardhje që kjo garë nuk financohet nga buxheti i pushtetit dhe nuk promovohet.
Sipas Ramosajt, kjo bjeshkë është ndër kryesoret në Ballkan pasi lidh Kosovën me Shqipërinë dhe Malin e Zi, dhe ndikon në zhvillimin ekonomik dhe sektorë të tjerë. Ramosaj shpreson që një ditë këto bjeshkë të promovohen dhe financohen nga dora e shtetit.
Drejtori i Turizmit në komunën e Deçanit Isuf Demhasaj u shpreh se gara të tilla sportive ndikojnë në zhvillimin e turizmit.
Kryetari i shoqatës “Shkëlzen Haradinaj”, Jeton Berisha foli mbi rëndësinë e promovimit të bjeshkëve të Gjeravicës për zhvillimin turistik të vendit.
“Këtu punohet me përkushtim, por asnjëherë asnjë ndihmë nga shteti nuk e kemi marrë”, ka thënë Berisha.
Pjesëmarrës ishte edhe kryetari i AAK-së, Ramush Haradinaj, i cili u nderua me mirënjohje.
