Gërvalla shkarkon konsullin nderi në Mal të Zi: Zero tolerancë për mohimin e Republikës së Kosovës
Ministrja në detyrë e Punëve të Jashtme dhe Diasporës, znj. Donika Gërvalla, ka njoftuar sot për përfundimin e mandatit të Shkelqim Devollit si Konsull Nderi i Republikës së Kosovës në Mal të Zi, për rrethin konsullor të Rozhajës, transmeton KosovaNews.
Vendimi, sipas ministres, ka ardhur menjëherë pasi ajo është informuar për rastin dhe është i pakthyeshëm.
Në një postim të ashpër në rrjetet sociale, Gërvalla theksoi se ky veprim synon mbrojtjen e dinjitetit të Republikës së Kosovës nga çdo përpjekje për mohimin e saj.
Ajo u shpreh se individët që mbajnë tituj nderi me dokumente që mohojnë Republikën e Kosovës, “mohojnë gjakun e derdhur për liri, mohojnë ekzistencën tonë, mohojnë Republikën tonë.”
Ministrja Gërvalla nuk ndaloi me kaq, duke aluduar se bëhet fjalë për individë që “ndërsa përfitojnë nga Kosova, regjistrojnë biznese me adresa serbe, përhapin propagandë kundër udhëheqjes shtetërore dhe investojnë miliona për të njollosur imazhin e Kosovës në opinionin publik.”
Ajo e cilësoi këtë vendim si “më shumë se një akt administrativ”, duke e konsideruar atë si një “betim institucional që Kosova nuk do të përfaqësohet kurrë nga ata që i shërbejnë narrativave të shteteve që nuk e njohin pavarësinë tonë.”
Duke përfunduar postimin e saj, Gërvalla ishte e qartë: “Kushdo që mohon shtetësinë e Kosovës, nuk mund të jetë përfaqësues i Kosovës. Kushdo që lëkund të vërtetën tonë shtetërore, do ta gjejë Republikën tonë të vendosur dhe të përgatitur ndaj veprimeve të tyre.”
Mesazhi i saj përfundoi me theksin e fortë: “Asnjëherë ‘Peć, Serbia’ por Pejë, Republika e Kosovës.”.
