Qindra qytetarë protestuan sot në Prishtinë kundër paralajmërimit për shtrenjtimin e energjisë elektrike, duke ia rikujtuar qeverisë premtimet e dikurshme për drejtësi energjetike.
Nën moton “Asnjë cent më shumë”, ata kërkuan që të pezullohet propozimi i Zyrës së Rregullatorit për Energji (ZRrE) për rritjen e tarifës së energjisë për 15%.
Me pankarta në duar ku shkruhej “Nuk paguajmë për dështimet tuaja”, “Qytetarët nuk janë bankomat”, “Rrymë për jetë, jo për profit”, protestuesit marshuan nga sheshi “Skënderbeu” deri te ndërtesa e Ministrisë së Ekonomisë, ku vendosën parullat në shenjë pakënaqësie.
Aktivisti Besnik Shabiu deklaroi se qytetarët nuk mund të mbajnë më barrën e çmimeve në rritje dhe paralajmëroi protesta të tjera nëse vendimi për shtrenjtimin miratohet.
“Populli i zhytur në kredi dhe borxhe nuk e meriton që jeta t’i vështirësohet edhe më shumë. Kërkojmë pezullimin e propozimit për 15% shtrenjtim dhe një plan afatgjatë që e nxjerr Kosovën nga kriza energjetike”, tha ai.
Një ndër zërat kritikë ishte edhe Ali Sefaj nga Shoqata Sindikale e Shërbyesve Civilë, i cili tha se qeveria po injoron zërin e qytetarëve.
“Ministria e Ekonomisë duhet t’i marrë seriozisht këto kërkesa. Në të kundërtën, protestat do të rriten dhe do të vazhdojnë”.
Aktivisti Dibran Hoxha akuzoi kompaninë KEDS për abuzim të përvitshëm me tarifat dhe kërkoi transparencë rreth kontratës së saj dhe investimeve të premtuara.
“KEDS-it i është tharë fyti prapë, dhe për ta lagur atë, janë rreshtuar bashkë Ministria, ZRrE, Presidenca dhe Qeveria. Por populli nuk do të heshtë.”
Në mesin e protestuesve, qytetari Bajram Uka kujtoi deklaratat e mëhershme të kryeministrit Albin Kurti, duke thënë:
“Thoshte se flejmë mbi qymyr, e sot po na rrit rrymën për tri herë. Kjo është hipokrizi.”
ZRrE ka paralajmëruar se vendimi për tarifat e reja do të merret më 11 prill, dhe se ato mund të hyjnë në fuqi qysh nga 1 prilli ose 1 maji.
Sipas propozimit, tarifa ditore për konsumatorët që shpenzojnë deri në 800 kWh në muaj do të rritet nga 7.79 centë në 8.96 centë.
ZRrE e ka justifikuar rritjen me rënien e prodhimit vendor, konsum më të lartë, si dhe varësinë nga importi i shtrenjtë i energjisë.
Kosova vazhdon të përballet me sfida të mëdha në sektorin energjetik për shkak të vjetërsisë së termocentraleve “Kosova A” dhe “Kosova B”, dhe mungesës së prodhimit të qëndrueshëm nga burimet e ripërtërishme.
Protesta e radhës është paralajmëruar më 11 prill, në të njëjtën ditë kur pritet edhe vendimi final për shtrenjtimin e tarifave të energjisë elektrike.
Grupi “Asnjë cent më shumë” ka thënë se nëse vendimi merret, protestat do të intensifikohen.
