Deputetet e Kuvendit të Kosovës kanë debatuar e polemizuar mes vete në seancën e djeshme për një sërë çështjesh, ndërsa u votuan edhe disa nga pikat e rendit të ditës, duke përfshirë këtu edhe themelimin e një komisioni hetimor parlamentar për rezervat e shtetit.
Kjo ishte edhe pika ku pati më shumë përplasje mes deputetëve të pozitës dhe opozitës.
E në një rast deputeti i PDK-së, Ferat Shala deri sa fliste për ambasadorin Martin Berishaj iu drejtua deputetit nga radhët e Vetëvendosjes, Gani Krasniqit, duke i thënë se po qesh edhe pse e di që Martini e Albini janë shokë.
Kjo ka nxitur edhe reagimin e deputetit Gani Krasniqi, i cili një këtë rast ai tha në sy e me zë të lartë Ferat Shalës se është një person që përveç tjerave ka falsifikuar edhe historinë më të ndritshme të kombit, aksionet e Ushtrisë Çlirimtare të Kosovës (UÇK).
“Qeshi prej zori ndonjëherë, sidomos kur flet Ferat Shala për intelektualitetin, edhe për patriotizmin edhe për njerzinë, duke më folur edhe për pastërtinë e duke nxënë në gojë korrupsionin. Ferat jemi shokë, na lidhë lufta edhe ndihem mirë për atë pjesë. Por kur edhe në atë pjesë të luftës, në pjesën më të ndritshme të historisë së kombit tonë, të kësaj pjesë të atdheut që ishte e pushtuar, ti e di, je marrë me falsifikimin e ndryshimit të aksionit që e ka bërë UÇK-ja…”, ka thënë Krasniqi në reagimin e tij.
Gani Krasniqi është veprimtar i shquar atdhetar dhe vjen nga një familje dëshmoresh që luftuan për çlirimin e atdheut.
Ai u angazhua qysh herët në Lëvizjen çlirimtare, pjesëmarrës i ngjarjeve të pranverës së vitit 1981 dhe mandej dhe një nga themeluesit dhe drejtuesit e UÇK-së.
Reagimi i plotë i Gani Krasniqit ndaj Ferat Shalës:
Është e vërtetë se kam shumë herë diçka të flas sidomos kur e dëgjoj si Ferat Shala tha po çka po heshtë Ganiu, se qeshi me zor nganjëherë kur dëgjoj që qifti i Feratit më flet edhe për intelektualitetin, edhe për patriotizmin edhe për njerzinë, duke më folur edhe për pastërtinë e duke nxënë në gojë korrupsionin. Ferat jemi shokë, na lidh lufta edhe ndihem mirë për atë pjesë. Por kur edhe në atë pjesë të luftës, në pjesën më të ndritshme të historisë së kombit tonë, të kësaj pjesë të atdheut që ishte e pushtuar, ti e di, je marrë me falsifikimin e ndryshimit të aksionit që e ka bërë UÇK-ja… Unë s’mundet të flas me ty, jo jo unë jam i gatshëm për t’i hyrë kësaj ngase unë e di çka është jeta ilegale por prejse është çliruar Kosova unë nuk kam qëndruar fshehur duke frikën se po më kërkojnë për ato që janë bërë në Trepçë.
