Përparim Rama, kryetari i Komunës së Prishtinës, ka marrë vendim që t’i lirojë nga pagesa e biletave të autobusëve të “Trafikut Urban” disa kategori të qytetarëve. Vendimi do të nisë të zbatohet 11 ditë para se të mbahen zgjedhjet lokale.
Sipas vendimit të datës 25.09.2025, kategoritë që lirohen nga pagesa nga data 01.10.2025 janë: stafi shëndetësor dhe ai administrativ, teknik e mbështetës në të gjitha institucionet shëndetësore në kryeqytet.
Po ashtu, të gjithë nxënësit e shkollave të mesme në kryeqytet, si dhe studentët e kryeqytetit.“Stafi mësimor dhe stafi administrativ, teknik dhe mbështetës i të gjitha institucioneve arsimore të kryeqytetit, përfshirë institucionet parashkollore; të gjithë punonjësit e administratës së Kryeqytetit te të gjitha niveleve, përfshirë institucionet vartëse të kryeqytetit” – janë dy kategoritë e tjera të liruara nga pagesa sipas vendimit të kryetarit Rama.
Zgjedhjet lokale do të mbahen më 12.10.2025 dhe Rama është duke kandiduar për një mandat të dytë.Ky nuk është vendimi i vetëm që Rama ka marrë për lirimin nga pagesa të udhëtarëve të kryeqytetit në “Trafik Urban”. Nga data 17.03.2025, biletat ndërurbane të udhëtarëve që vijnë nga çdo qytet i Kosovës në Stacionin e Autobusëve në Prishtinë, janë duke u inkorporuar si bileta falas në transportin urban gjithëditor në kryeqytet.
Rama kishte thënë se me këtë organizim të ri të transportit publik, kryeqyteti do të ketë më pak vetura, më pak trafik, më pak ndotje ambientale dhe më shumë organizim dhe siguri.“Ky është edhe një hap tjetër i rëndësishëm në procesin e reformës për transportin publik në kryeqytet, nga i cili do të përfitojnë edhe qytetarët e kryeqytet.
Me këtë organizim të ri të transportit publik, kryeqyteti do të ketë më pak vetura, më pak trafik, më pak ndotje ambientale dhe më shumë organizim dhe siguri” – kishte shkruar Rama në Facebook më 17.03.2025.
