Në shënimin e 15 vjetorit të pavarësisë së Kosovës, para Teatrit Kombëtar në kryeqytet, janë ndezur 1133 qirinj, numër ky që simbolizon numrin e fëmijëve të vrarë gjatë luftës. Shumë fëmijë janë mbledhur para Teatrit Kombëtar për t’i kujtuar fëmijët e vrarë, raporton KosovaNews.
Në këtë ceremoni të pranishëm ishin dhe presidentja e Kosovës Vjosa Osmani, kryeministri Albin Kurti si dhe kryetari i Kuvendit Glauk Konjufca.
Kryeministri Kurti u tha fëmijëve të pranishëm se sakrifica e popullit është e madhe dhe se plagët e luftës janë të thella, por se gëzimin dhe lumturinë e fëmijëve s’ka pikëllim që e mund.
“Shpresë jeni ju fëmijet e Kosovës. Ju po e mbani nga një qiri në duart tuaja në këtë buzëmbrëmje. Janë 1133 qirinj, sepse secili prej tyre tregon për një fëmijë që është vrarë gjatë luftës dhe nuk është në mesin tonë. Ne ata do t’i kujtojmë dhe kurrë s’do t’i harrojmë. Sakrifica e popullit tonë është e madhe plagët e luftës janë të thella. Por gëzimin dhe lumturinë tuaj nuk ka pikëllim që e mund”, tha Kurti./KosovaNews/
