Kosova ndodhet para momentit më të rëndësishëm në historinë e saj futbollistike.
Federata e Futbollit të Turqisë (TFF) ka konfirmuar se drejtësia në finalen e madhe të “play-off”-it i është besuar një tresheje elitare nga Premier Liga angleze.
Ndeshjen historike do ta drejtojë arbitri i njohur anglez, Michael Oliver, raporton AA, transmeton KosovaNews.
Ai do të ndihmohet nga asistentët Stuart Burt dhe James Mainwaring, të dy me përvojë të gjatë në futbollin anglez dhe atë ndërkombëtar.
Ndërkaq, roli i arbitrit të katërt për këtë përballje i është besuar Christopher Kavanagh.
Sfida vendimtare, që përcakton fatin e “Dardanëve” drejt ëndrrës botërore, do të luhet të martën, më 31 mars, në stadiumin “Fadil Vokrri” dhe do të nisë në orën 20:45.
Kjo është finalja e fazës “play-off” që përcakton kualifikimin direkt për në kampionatin botëror FIFA World Cup 2026.
