Deputeti i Lidhjes Demokratike të Kosovës, Avdullah Hoti, ka publikuar një video të rrugës Pejë-Rugovë, në llogarinë e tij në Facebook.
Ai ka akuzuar Qeverinë se ka harxhuar miliarda euro në asfaltim të rrugëve, që sipas tij janë plasaritur brenda një kohe të shkurtër.
“Ja si janë harxhuar 8.63 miliardë euro këto tri vjet”, ka shkruar Hoti krah videos së publikuar të rrugës, ku dëgjohet duke thënë se asfalti është tërësisht i plasaritur dhe bazuar në ngjyrën e asfaltit, sipas tij, ndërtimi i rrugës është bërë para disa javësh.
Lidhur me videon e publikuar nga Hoti ka reaguar zëvendësministri i Infrastrukturës, Hysen Durmishi, i cili e ka pranuar se gjendja e rrugës është ashtu siç shihet në video.
“Avdullah Hoti e paska postuar një video të gjendjes në rrugën Pejë – Rugovë. E vërtetë është ajo që shihet në atë video. Ne kemi nënshkruar një kontratë për sanimin e asaj rruge me qëllimin që ta rregullojmë rrugën shumë të dëmtuar. Kemi pasur shumë ankesa nga qytetarët se nuk po punohet si duhet dhe ne kemi formuar një komision profesional që ta konstatojë gjendjen. Të gjeturat e këtij komisioni janë se jo vetëm cilësia e punimeve që është jashtë çdo standardi, por se janë bërë pagesa edhe për pozicione që nuk janë punuar fare”, ka shkruar Durmishi.
Ai më tej ka thënë se është iniciuar procedurë disiplinore ndaj menaxherit të kontratës dhe lënda është dërguar në prokurori për shkak se ka elemente të veprës penale.
“Kemi informata që prokuroria ka filluar menjëherë që të marrë veprime dhe ne po presim rezultatet e hetimit të tyre”, ka theksuar ai.
