Një delegacion i Kosovës i prirë nga zëvendësministri i Punëve të Brendshme, Bardhyl Dobra gjatë qëndrimit të tij në Francë, u takua me Ministrin e Transformimit dhe Shërbimit Publik të Republikës së Francës, Stanislas Guerini dhe ekipin e tij.
Profesionalizimi dhe modernizimi i administratës publike, tërheqja e talentëve, arsimimi dhe trajnimet në fushën e administratës publike, ishin ndër të tjera tema të diskutimit përmbajtësor mes tij dhe nikoqirit.
Të dy kanë nënshkruar marrëveshje bashkëpunimi, e cila fokusohet ndër të tjera në fuqizimin e burimeve njerëzore, përmirësimin e proceseve të rekrutimit dhe proceseve të tjera administrative, si dhe trajnimet në fushën e administratës publike.
“Nga ky takim u kuptua se të dyja shtetet përballen me sfida të ngjashme dhe se reformat që të dyja qeveritë janë duke ndërmarrë për të transformuar administratat respektive kanë ngjashmëri të mëdha dhe se bazohen në parime të pranuara si të mirëqena në botën demokratike si: meritokracia, besimi i qytetarëve në institucione, de politizimi i administratës, mundësi të barabarta për të gjithë, mobilitet përbrenda administratës dhe bashkëpunim me sektorin privat, administratë efikase, shërbime publike kualitative për të gjithë qytetarët”, thuhet në kumtesën e MPB-së./KosovaNews/
