Presidenti ukrainas, Volodymyr Zelensky ka thënë të mërkurën se “Plani i tij i Fitores”, që synon të sjellë paqen në Ukrainë duke e mbajtur vendin të fortë dhe duke shmangur të gjitha “konfliktet e ngrira”, tani është i përfunduar, pas shumë konsultimeve.
Zelensky u zotua muajin e kaluar t’ia paraqesë planin e tij presidentit të SHBA-së Joe Biden, me sa duket javën e ardhshme kur ai të marrë pjesë në seancat e Këshillit të Sigurimit të OKB-së dhe Asamblesë së Përgjithshme, raporton Reuters.
Zelensky ka ofruar pak të dhëna për përmbajtjen, duke treguar vetëm se synon të krijojë kushte të pranueshme për Ukrainën, tashmë e bllokuar në konflikt me Rusinë për më shumë se dy vjet.
“Sot, mund të thuhet se plani ynë i fitores është plotësisht i përgatitur. Të gjitha pikat, të gjitha fushat kryesore të fokusit dhe të gjitha shtesat e nevojshme të detajuara të planit janë përcaktuar”, ka deklaruar Zelensky në një videoadresim të mërkurën vonë.
“Gjëja më e rëndësishme është vendosmëria për ta zbatuar atë”, ka shtuar ai.
Të martën, presidenti ka thënë se një takim me komandantët e lartë kishte prodhuar “përmbajtje të mirë dhe të fortë” në aspektin ushtarak, “pikërisht atë lloj që mund të forcojë ndjeshëm Ukrainën”.
Zelensky ka përdorur si bazë për negociatat një plan paqeje që ai paraqiti në fund të vitit 2022, duke bërë thirrje për tërheqjen e të gjitha trupave ruse, dhe rivendosjen e kufijve post-sovjetikë të Ukrainës.
