Presidenti ukrainas Volodymyr Zelensky ka ndarë detaje nga takimi i tij me homologun e tij amerikan Donald Trump në Hagë, në kuadër të samitit të NATO-s.
Zelensky tha se takimi me Trump ishte i mirë. Të dy udhëheqësit diskutuan për Lindjen e Mesme, mbrojtjen e popullit ukrainas, blerjen e sistemeve amerikane të mbrojtjes ajrore dhe bisedimet midis delegacioneve ukrainase dhe ruse në Stamboll.
Gjatë bisedës, Zelensky theksoi rëndësinë e veprimeve të fundit të SHBA-së në Iran, të cilat dobësuan jo vetëm programin bërthamor të vendit, por edhe prodhimin e dronëve të tij, transmeton Telegrafi.
“Ne diskutuam mbrojtjen e popullit tonë me presidentin – para së gjithash, blerjen e sistemeve amerikane të mbrojtjes ajrore për të mbrojtur qytetet tona, popullin tonë, kishat dhe infrastrukturën”, deklaroi Zelensky.
Ai e informoi Trumpin mbi takimet e ekipit teknik në Stamboll, si dhe shkëmbimet e të burgosurve të luftës dhe trupat e të rënëve. Zelensky tërhoqi vëmendjen për faktin se Rusia kishte kthyer trupat e ushtarëve të saj të rënë në Ukrainë.
“Folëm për situatën në fushëbetejë. Putini definitivisht nuk po fiton. I paraqita presidentit faktet rreth asaj që po ndodh vërtet në terren”, shtoi presidenti ukrainas.
