Pas propozimit të presidentit rus Vladimir Putin për bisedime dypalëshe, presidenti i Ukrainës, Volodymyr Zelensky, ka shtuar përpjekjet për një takim të drejtpërdrejtë në Turqi të enjten, duke i bërë thirrje edhe SHBA-së që të vendosë sanksione ndaj Rusisë nëse Putini refuzon të marrë pjesë.
Zelensky i kërkoi presidentit amerikan Donald Trump, të ndihmojë në sigurimin e këtij takimi me Putinin në Turqi, duke e akuzuar liderin rus se nuk është serioz në përpjekjet për të ndalur luftën.
“Do të bëjmë gjithçka që ky takim të ndodhë,” deklaroi Zelensky, ndërsa shtoi: “Unë besoj se Putini nuk dëshiron që lufta të përfundojë, nuk dëshiron armëpushim dhe nuk dëshiron asnjë lloj negociate.”
Kremlini deri më tani nuk ka komentuar mbi ftesën e Zelenskyt për një takim në Turqi për të dytën ditë radhazi, edhe pse vetë Putini kishte sugjeruar më parë mundësinë e bisedimeve të drejtpërdrejta mes Rusisë dhe Ukrainë, shkruan Le Monde.
Nga ana tjetër, Trump është shprehur pozitivisht për idenë e një takimi mes dy presidentëve dhe ka thënë se mund të marrë pjesë vetë.
“Ne e kemi ftuar Presidentin Trump të na bashkohet. Nuk e di ende vendimin e tij, por nëse ai e konfirmon pjesëmarrjen, besoj se kjo do t’i jepte një shtysë shtesë që Putini të vijë,” tha Zelensky në një konferencë për shtyp në Kiev.
Kievi gjithashtu i ka kërkuar Shteteve të Bashkuara që të vendosin paketën më të ashpër të sanksioneve kundër Moskës nëse Putini refuzon të marrë pjesë në takim.
“Kjo duhet të jetë paketa më e fortë e sanksioneve,” tha Zelensky për gazetarët në Kiev. Refuzimi i Putinit për të marrë pjesë në takim “do të ishte një sinjal i qartë se ata nuk duan dhe nuk kanë ndërmend ta përfundojnë luftën,” shtoi ai.
