“Mona Lisa” e Leonardo Da Vinçit është një nga veprat më të njohura të artit në botë, e famshme për bukurinë e saj, si dhe misterin që rrethon identitetin e modeles dhe vendndodhjen e saj.
Ku është vendi pas Mona Lisës? Kjo temë ka qenë një burim debati prej vitesh. Fshati Ponte Buriano, një periferi e Arezzo-s në rajonin e Toskanës të Italisë, është i bindur se ura pas Mona Lizës është pikërisht në Ponte Buriano aq sa e kanë bërë atë një tipar kyç të fushatës së tyre turistike lokale.
Mirëpo tani, historiani Silvano Vinceti thotë se ura pas Mona Lizës është në fakt Ura Romito në qytetin e afërt toskan të Laterinës.
“Forma dalluese e lumit Arno përgjatë asaj shtrirjeje territori korrespondon me atë që Leonardo portretizoi në peizazhin në të majtë të gruas së përshkruar në pikturën e famshme”, tha Vinceti në një konferencë për media në Shoqatën e Shtypit të Huaj në Romë.
Vinceti gjithashtu bëri një rindërtim virtual të urës për të treguar ngjashmëritë dhe u mbështet në dokumente nga arkivat shtetërore në Firence.
“Mona Lisa” u pikturua në fillim të shekullit të 16-të. Midis 1501 dhe 1503 Da Vinci jetoi me kardinalin Cesare Borgia pranë Laterinës. Ura ishte në përdorim dhe kishte katër harqe, siç përshkruhet në veprën e artit. Nga ana tjetër, ura Buriano ka gjashtë harqe.
Ura Romito lidhte Arezzo, Fiesole dhe Firence, por tani është në rrënoja. Unë kam studiuar imazhet me dron të brigjeve të lumenjve, rrënojat dhe fotografitë gjatë viteve për të përcaktuar se “ura etrusko-romake Romito është padyshim ajo në sfondin e pikturës”, ka thënë historiani Silvano Vinceti.
“Mona Lisa” nga Leonardo Da Vinci në ekspozitë në Luvrin në Paris
Kryebashkiaku i Laterinës, Simona Neri, ishte gjithashtu i pranishëm në konferencën për shtyp dhe u shpreh i emocionuar pasi thekson se kjo urë mund të sjellë mijëra turistë.
“Ne duhet të përpiqemi të mbrojmë atë që ka mbetur nga ura, e cila do të kërkojë financim”, tha Neri, duke vënë në dukje se ka fonde në dispozicion për shumicën e zonave të lidhura me Da Vinçin dhe mjeshtrit e tjerë.
Kryevepra e shekullit të 16-të e Da Vinçit tani ndodhet në Luvrin në Paris, ku shihet nga miliona vizitorë çdo vit.
