Real Madrid po intensifikon përgatitjet për ndeshjen e 1/16-ës në Kupën e Botës për Klube, ku më 1 korrik do të përballet me Juventusin në Miami.
Skuadra e drejtuar nga Xabi Alonso ka përfunduar në krye të grupit H, duke marrë dy fitore dhe një barazim në tre ndeshjet e para nën drejtimin e trajnerit bask, i cili tashmë ka nisur të lërë gjurmët e tij në ekip, pavarësisht se ka ruajtur formacionin bazë pothuajse të pandryshuar.
Një nga dilemat kryesore për Realin është gjendja e Kylian Mbappe. Ylli francez nuk ka luajtur asnjë nga ndeshjet e grupit për shkak të një problemi shëndetësor, por optimizmi është i lartë që ai do të jetë gati për titullar ndaj Juventusit.
Alonso pritet të marrë një vendim për Mbappe vetëm në momentet e fundit, por ndërkohë ka edhe një tjetër emër të ri në skuadër: Endrick Felipe ka mbërritur në Miami.
Lexo po ashtuLëndohet veterani i Real Madridit – pritet të mungojë rreth një muaj
Edhe pse braziliani 18-vjeçar ishte përfshirë në listën fillestare të lojtarëve, ai kishte mbetur në Madrid për shkak të një dëmtimi muskulor.
Gjatë kësaj kohe, ai ka punuar me fizioterapistët e klubit për të përfunduar rikuperimin, në përpjekje për t’u rikthyer në formë të plotë para fillimit të sezonit 2025/2026.
Sipas Mundo Deportivo, Endrick ka përfunduar rehabilitimin dhe ka marrë dritën e gjelbër nga Alonso për t’u bashkuar me pjesën tjetër të skuadrës në Florida.
Meqenëse ishte përfshirë në listën e FIFA-s para afatit të 10 qershorit, ai është i disponueshëm për të luajtur në këtë turne, megjithatë nuk pritet të rrezikohet në ndeshje zyrtare.
Raporti thekson se Alonso do të shfrytëzojë këtë grumbullim për ta testuar Endrick brenda grupit aktual dhe për të parë më qartë se ku mund të përshtatet në projektin afatgjatë të skuadrës.
