Zvicra do të përballet të martën me Andorrën në ndeshjen e radhës kualifikuese për Kampionatit Evropian, ndërsa përzgjedhësi Murat Yakin në konferencë për shtyp foli edhe për kapitenin Granit Xhaka dhe deklaratat e tij.
Yakin nuk ka mundur t’i shmanget përgjigjes së disa pyetjeve për “çështjen Xhaka”, ku përzgjedhësi tha se është sqaruar me kapitenin dhe se komentet e tij i ka marr më shumë si sugjerim se sa si kritike.
Ai shtoi se ajo që bëri Xhaka nuk ishte e zgjuar, duke shtuar se: “Nuk do të ndodhë më”.
Yakin dhe Xhaka kanë biseduar për 45 minuta për fjalët e kapitenit, kur tha se stërvitjet nuk ishin në intensitetin e duhur.
“Ditën e djeshme kemi pasur një bisedë të hapur dhe të sinqertë. Nuk ishte e nevojshme që publikisht t’i shprehte kritikat apo sugjerimet në atë mënyrë dhe këtë ia thash. Personalisht nuk e kam parë si kritikë, por më shumë si sugjerim”.
“Graniti vetëm dëshiron të jetë me shumë i përfshirë në javët e stërvitjeve dhe kjo për mua është në rregulla. Pas 45 minutave, biseda përfundoi dhe tani duam të koncentrohemi në ndeshjen e radhës. E njoh Granitin shumë mirë dhe e kuptoj mirë”, ka thënë Yakin.
Tutje përzgjedhësi shtoi se Xhaka si kapiten ta udhëheq Zvicrën përpara drejt kualifikimit dhe shtoi se ekipi është në rrugën e duhur për ta arritur këtë gjë.
“Siç e thash, nuk e shoh si kritikë edhe pse është detyra e tij si kapiten dhe e kërkoj një gjë të tillë prej tij. Natyrisht, nuk duhet të jetë publike dhe menjëherë pas ndeshjes. Ajo nuk ishte e nevojshme dhe aspak e mençur”, ka thënë Yakin.
