Sunderland ka arritur një fitore të madhe në “Stamford Bridge” ndaj Chelseat, dhe një nga meritorët kryesorë për këtë sukses ishte mesfushori shqiptar, Granit Xhaka.
Për “Macet e kuqe”, largimi nga Londra me tri pikë ishte një mision i vështirë, por jo i pamundur falë paraqitjes fantastike të 33-vjeçarit.
Xhaka dominoi plotësisht mesfushën, duke neutralizuar dyshen e Chelseat, Moses Caicedo dhe Enzo Fernandez — që së bashku kushtojnë rreth 220 milionë euro.
Përveç kontrollit të lojës, Xhaka u dallua edhe për saktësinë e lartë në veprime dhe për faktin se fitoi më shumë duele në fushë pa shkaktuar asnjë faull.
“Granit Xhaka është blerja më e goditur e sezonit”, shkruan “Sky Sport”, duke e vlerësuar si liderin e padiskutueshëm të Sunderlandit.
Britanikja thekson se ish-mesfushori i Arsenalit ka arritur për një kohë të shkurtër të udhëheqë ekipin drejt vendeve të para të Premier League, vetëm një vit pasi skuadra garonte në Championship.
