Lëvizja Vetëvendosje, dega në Prizren, ka reaguar sot pas raportimeve në media lidhur me një tender për organizimin e një ekskursioni për maturantët e shkollës së mjekësisë “Luciano Motroni” në këtë komunë.
Sipas këtyre raportimeve, kompania “Bashkimi Reisen”, që lidhet me drejtorin e Inspektoratit të Komunës së Prizrenit, Islam Ukimeri, ka përfituar mbi 48 mijë euro përmes një tenderi të dyshimtë, që kishte të bënte me dërgimin e 450 maturantëve në Shqipëri. Vetëvendosje pretendon se gjatë procesit të tenderimit është përjashtuar një kompani konkurrente dhe se procedura fillestare është anuluar.
Në reagimin e saj, kjo parti ka kërkuar nga organet kompetente të fillojnë hetimet, duke theksuar se ekzistojnë dyshime për parregullsi në këtë proces.
Zyrtarët komunalë nuk kanë komentuar ende mbi këto akuza.
