Ministrit të Punëve të Brendshme të Serbisë, Aleksandar Vulin, duket se i ka ‘djegur’ deklarata që bëri dje presidentja e Kosovës, Vjosa Osmani, e cila pas takimit me Sekretarin amerikan të Shtetit, Antony Blinken, nga Departamenti i Shtetit e quajti Serbinë satelit të Rusisë në rajon.
Osmani të martën në mbrëmje u shpreh se Rusia synon ta destabilizojë Ballkanin nëpërmjet satelitit të saj, Serbisë.
Ajo ka thënë se këtë çështje e kanë diskutuar edhe në takim me sekretarin Blinken.
Një ditë pas, Vulini ka reaguar, duke thënë se “Serbia s’është satelit i askujt, por shtet i pavarur e që Prishtina s’është”.
“Serbia i merr vendimet si e pavarur, e Prishtina as që është, e as që mendon të bëjë kështu. Serbia s’është satelit i askujt, por Prishtina është e pavarur aq sa është shenjtor Stepinaci (kardinal kroat që Zagrebi e konsideron të shenjtë, e Serbia kriminel të Luftës së Dytë Botërore). Serbia është gardiane e paqes në Ballkan dhe Rusia e destabilizon rajonin, po aq sa na bombardoi neve, po aq sa u përpoq të shkëpuste një pjesë të territorit të Serbisë dhe po aq sa u përpoq të anulonte Marrëveshjen e Dejtonit”, ka ironizuar Vulini, sipas Ministrisë së Brendshme të Serbisë.
Vulini ka thënë se Serbia s’është pjesë e “histerisë anti-Rusi” dhe se kjo s’do të thotë që është satelit, “por dëshmi që ka politikë neutrale dhe se është shtet i pavarur e sovran”.
/////
